Pas atentatit të dy ditëve më parë në Orikum, policia ka bërë të ditur se ka zbardhur ngjarjen, duke identifikuar autorët e dyshuar të plagosjes, ndërsa një person është vënë në pranga.
Sipas uniformave blu të Vlorës, autorët janë ende në kërkim dhe po punohet për kapjen e tyre, ndërsa u arrestua shoku i djalit të plagosur që i bënë atentat, pasi në makine iu gjet drogë.
I riu që iu bë atentat në Orikum është Denis Brahimi, 23 vjeç, ndërsa droga e gjetur në mjet, është edhe pista kryesore ku po heton policia.
Dyshohet se shkak për konfliktin mes autorëve dhe 23-vjeçarit të plagosur, të jetë prishja e pazareve të drogës.
Edhe i arrestuari Geraldo Hasanaj, 20 vjeç, i cili ndodhej në vendngjarje, gjatë marrjes në pyetje ka deklaruar se përpara plagosjes, mes autorëve dhe shokut të tij ka patur një debat verbal.
INFORMACIONI
Në vijim të informacionit të dhënë ditën e djeshme nga Policia në lidhje me ngjarjen (plagosjen me armë zjarri), të ndodhur në hyrje të Orikumit, ku mbeti i plagosur një shtetas, ju informojmë se:
Nga veprimet hetimore të kryera prej Policisë ka rezultuar se në hyrje të qytetit të Orikumit, shtetasit G.Ç., 23 vjeç, dhe G.B., 33 vjeç, për motive të dobëta, kanë qëlluar me armë zjarri drejtim shtetasit D.B., duke e lënë të plagosur, jashtë rrezikut për jetën, dhe janë larguar prej vendit të ngjarjes me mjetin tip Volksëagen, i cili u gjet i braktisur në vendin e quajtur “Çipaj” në aksin rrugor Orikum-Llogara.
Gjithashtu në vijim të veprimeve hetimore Policia ka arrestuar shtetasin Geraldo Hasanaj, 20 vjeç, banues në Orikum, (lidhje shoqërore e të dëmtuarit dhe i ndodhur në vendngjarje), sepse gjatë kqyrjes së vendit të ngjarjes, në mjetin e tij tip “Ford Fiesta” Policia ka konstatuar një sasi (514 gr) lëndë narkotike Cannabis Sativa.
Janë sekuestruar në cilësinë e provës materiale: dy automjete, një mjet Volksëagen i përdorur prej autorëve dhe mjeti tip Ford Fiesta e shtetasit të arrestuar, lënda narkotike, një aparat celular si edhe gëzhoja e kalibrit 7.62 mm e gjetur në vendngjarje.
Policia ka bërë shpalljen në kërkim për të dy autorët, shtetasit G.Ç., G.B., dhe po vijon intesivisht punën për kapjen e ndalimin e tyre. Materialet hetimore iu referuan Prokurorisë së Rrethit Gjyqësor Vlorë për veprime të mëtejshme procedurale.
a.ç
