Polemika të mëdha në Spanjë. Jo aq për humbjen me Kroacinë se sa për gjestin e Gerard Pique. Mbrojtësi i Barcelonës është kapur nga kamera teksa nxjerr gishtin e mesit gjatë ekzekutimit të himnit.
Pique është katalanas dhe përkahës i flaktë i pavarësisë së Katalonjës nga Mbretëria e Spanjës, megjithatë në Twitter ka shkruar se po kryqëzonte gishtat, për t’i sjellë fat.
“Po kryqëzoja gishtat gjatë himnit. Boll kërkuam polemika aty ku nuk ka dhe të përpiqemi të fitojmë evropianin të bashkuar”, shkruan Pique, por askush nuk e ka besuar.
Katalanasit janë të bindur se gishti gjatë himnit ishte një simbol për kauzën e tyre, ndërsa spanjollët e kanë konsideruar si një gjest për të ardhur keq.
Edhe për asnjanësit duket e tepër rastësia e kryqëzimit të gishtave pikërisht në momentin e kalimit të kameras përballë tij.
Në të kaluarën, Pique ka qenë vazhdimisht problematik për kombëtaren, me kunjat kundër madrilenëve, e sidomos me konfliktin në rrjetet sociale me Alvaro Arbeloan, çka solli edhe ndërhyrjen e trajnerit Del Bosque, për të mos mbjellë përçarje.
d.i.
