Pajisjet elektronike janë “vrasësi” numër një i syve. Qëndrimi për një kohë të gjatë para ekraneve të pajisjeve elektronike vë në rrezik shikimin. Sidomos drita blu tek ekrani është shkaku kryesor që dëmtohen sytë.
Prandaj Philips ka krijuar dy telefona të rinj inteligjentë të cilët përdorin teknologjinë “SoftBlue” tek ekrani. Kjo teknologji anti-blu zvogëlon sasinë e dritës blu që vjen nga ekrani i telefonit inteligjent deri në 86%. Kjo veçori e re gjendet vetëm tek telefonat inteligjentë Philips Sapphire S616 dhe Philips Sapphire Life V787.
Sapphire S616 përmban ekran 5.5 inç IPS me rezolucion 1080 x 1920 pikselë. Ai fuqizohet nga procesori MediaTek MT6753 SoC me tetë bërthama, së bashku me kartën grafike Mali-T720 GPU, 2GB RAM dhe 16GB hapësirë të brendshme.
Telefoni ka kamerë parësore 13 megapikselë me hapje f/2.0 dhe kamerë për selfie 5 megapikselë. Ai ofron bateri me kapacitet 3000mAh, dy vende për karta SIM me lidhjen 4G LTE, dhe operon me sistemin Android 5.1 Lollipop. Telefoni pritet të dalë në treg më 1 nëntor dhe do të kushtojë 222 dollarë.
Telefoni tjetër, Philips Sapphire Life V787, ka pothuajse të njëjtat veçori me telefonin e parë, me disa ndryshime të vogla. Ekrani, për shembull, është më i vogël, 5 inç me rezolucion 1080 x 1920 pikselë, ndërsa bateria është me kapacitet 5000mAh, e cila do të zgjasë për më shumë se 47 orë bisedë. Çmimi i këtij telefoni nuk është bërë i ditur.
