Gazetari Beqir Sina ka sqaruar në “Mirëmëngjes Shqipëri” vendimin e Shteteve të Bashkuara të Amerikës për pezullimin e vizave të imigrantëve për 75 vende, mes të cilave bën pjesë edhe Shqipëria.
Sina bëri me dije se administrata Trump nuk i ka pezulluar vizat, por ka vendosur një ngrirje të përkohshme të disa kategorive të vizave emigruese.
Sipas tij, interpretimi publik i vendimit ka qenë i gabuar. Memorandumi i firmosur nga administrata amerikane, sipas gazetarit, flet për ngrirje dhe jo pezulli, dhe kjo masë lidhet vetëm me vizat emigruese të përkohshme, deri në rishikimin e plotë të kritereve të verifikimit për aplikantët.
“Kjo ngrirje nuk prek vetëm 75 vendet që janë aktualisht në vëzhgim, por është pjesë e një procesi më të gjerë ku Departamenti i Shtetit po rishikon kriteret që duhet të plotësojnë aplikantët për të marrë vizë për në SHBA“, u shpreh Beqir.
Sipas tij, masat do të qëndrojnë në fuqi deri në momentin që zyrat konsullore të marrin udhëzime të qarta nga Departamenti i Shtetit mbi mënyrën e re të veprimit.
Sina sqaroi më tej se një nga pikat kryesore të memorandumit lidhet me barrën financiare mbi buxhetin amerikan, ku përfshihen ndihmat sociale dhe garancitë financiare që japin sponsorët për personat që aplikojnë për vizë. Ai theksoi se autoritetet konsullore do të kryejnë një kontroll të detajuar digjital, për të verifikuar nëse garantuesit përmbushin kriteret e përcaktuara dhe nëse aplikantët përbëjnë barrë buxhetore për shtetin amerikan.
Vendimi prek disa kategori, mes tyre lotarinë amerikane dhe bashkimin familjar.
Gazetari Beqir kujtoi se në fund të dhjetorit 2025, ish-presidenti Trump kishte lexuar një raport të DASH-it mbi ndihmat sociale, ku shqiptarët renditeshin në listën e 41 vendeve me përqindjen më të lartë të përfituesve të ndihmave sociale në SHBA.
“Shqiptarët janë përfshirë në këtë klasifikim për shkak të statistikave të vjetra, që i përkasin periudhës së bumit të emigracionit drejt SHBA-së”, theksoi ai, duke shtuar se rreth 41% e shqiptarëve të përfshirë në atë raport përfitonin ndihma sociale.
Megjithatë, sipas Beqirit, në memorandumin e ri shqiptarët nuk pritet të jenë ndër vendet më problematike për sa i përket barrës buxhetore, pasi shumë prej tyre arrijnë të mbulojnë financiarisht qëndrimin e tyre në SHBA.
