Depozitohet në Kuvend projektligji për një ndryshim në ligjin për “Kodin e Procedurës Penale”, i propozuar nga Kryeministri Edi Rama, kreu i grup[it parlamentar socialist Taulant Balla dhe kreu i Komisionit të Ligjeve, Ulsi Manja, në cilësinë e deputetëve.
Sipas relacionit shpjegues, projektligji synon plotësimin e pikës 2 të nenit 242 të Kodit të Procedurës Penale, duke zgjeruar rrethin e subjekteve ndaj të cilëve nuk do të zbatohet masa ndaluese e pezullimit nga detyra. Konkretisht, pas parashikimit aktual që kjo masë nuk zbatohet ndaj personave të zgjedhur sipas ligjit elektoral, propozohet të shtohen edhe: Presidenti i Republikës, Avokati i Popullit, Kryeministri, zëvendëskryeministri dhe ministrat, anëtarët e Gjykatës Kushtetuese si dhe Kryetari i Kontrollit të Lartë të Shtetit.
Ndryshimi në këtë projektligj nuk synon të kufizojë juridiksionin penal dhe as të krijojë paprekshmëri, por të vendosë një balancë ndërmjet ushtrimit të funksioneve kushtetuese dhe nevojës për garantimin e rendit juridik.
“PROJEKTLIGJ “PËR NJË NDRYSHIM NË LIGJIN NR. 7905, DATË 21.3.1995, “KODI I PROCEDURËS PENALE I REPUBLIKËS SË SHQIPËRISË”, TË NDRYSHUAR”
Në mbështetje të neneve 78, 81 dhe 83, pika 1, të Kushtetutës së Republikës së Shqipërisë, me propozimin e një grupi deputetësh
K U V E N D I I REPUBLIKËS SË SHQIPËRISË V E N D O S I:
Neni 1
Në nenin 242,në pikën 2, të ligjit nr. 7905, datë 21.3.1995, “Kodi i Procedurës Penale i Republikës së Shqipërisë”, të ndryshuar””, pas fjalëve:
2. Kjo masë nuk zbatohet ndaj personave të zgjedhur sipas ligjit elektoral “, shtohen fjalët:
“Presidentit të Republikës, Avokatit të Popullit, Kryeministrit, zëvendëskryeministrit dhe ministrave, anëtarëve të Gjykatës Kushtetuese dhe Kryetarit të Kontrollit të Lartë të Shtetit”, thuhet në pr.ligj.
Në relacion theksohet se ndryshimi nuk synon të kufizojë juridiksionin penal dhe as të krijojë paprekshmëri, por të vendosë një balancë mes ushtrimit të funksioneve kushtetuese dhe garantimit të rendit juridik. Subjektet e përfshira mbeten të hetueshme dhe të ndjekshme penalisht, ndërsa gjykata ruan të drejtën për të vendosur masa sigurimi personal sipas ligjit.
Projektligji sqaron dallimin ndërmjet masave shtrënguese dhe masave ndaluese në Kod. Masat shtrënguese, të parashikuara në nenin 232, kufizojnë drejtpërdrejt lirinë fizike të individit, ndërsa masat ndaluese, sipas nenit 240, kanë karakter funksional dhe lidhen me pezullimin e ushtrimit të një detyre apo funksioni publik.
Sipas argumentimit kushtetues, nisma është në përputhje me nenet 4, 7 dhe 116 të Kushtetutës, pasi nuk cenon ndarjen dhe balancimin e pushteteve, nuk ndërhyn në kompetencat e pushtetit gjyqësor dhe nuk zgjeron imunitetin kushtetues. Ndërhyrja cilësohet si procedurale dhe e kufizuar, me qëllim garantimin e funksionimit të pandërprerë të institucioneve të nivelit kushtetues.
Në përfundim, propozuesit theksojnë se projektligji nuk prek pavarësinë e prokurorisë dhe të gjykatave, nuk krijon mburojë ndaj përgjegjësisë penale dhe nuk përjashton asnjë subjekt nga juridiksioni penal, por synon të harmonizojë ushtrimin e funksioneve kushtetuese me procesin penal, në përputhje me parimin e shtetit të së drejtës.
