Partia Socialiste kërkoi sot largimin e deputetit të Partisë Demokratike Flamur Noka, për deklarim të rremë në formularin e dekriminalizimit.
Deputeti i PS, Alfred Peza i bëri thirrje Prokurorit të Përgjithsëm Adriatik Llalla të nisin hetimet për rastin e Nokës.
“I kërkojmë Prokurorit të Përgjithshëm të Republikës Adriatik Llalla, nisjen e menjëhershme të hetimeve për këtë rast. Nga ana tjetër, i kërkojmë Kryetarit të Partisë Demokratike Lulzim Basha të thyejë heshtjen dhe të shprehet publikisht dhe zyrtarisht për rastin e deputetit Flamur Noka. Zoti Basha, në kulturën tuaj politike, gjëja më e thjeshtë ka qenë hedhja e baltës dhe tregimi me gisht i kundërshtarëve të tu politikë, duke i akuzuar për kriminelë. Por, nëse e keni vërtetë seriozisht ashtu siç përbetoheni, kauzën e dekriminalizimit, duhet ta tregoni SOT shembullin e zbatimit të ligjit për deputetët tuaj. Sepse ka një rast konkret dhe një provë konkrete”, tha Peza.
“Shqiptarët duhet të shohin nga njëra anë baltën dhe shpifjet e Lulzim Bashës për deputetët e mazhorancës,- ku asnjëri nuk ka dalë i dënuar,- e nga ana tjetër duhet të shohin ish ministrin e Brendshëm, deputetin e Partisë Demokratike Flamur Noka që ka dhënë dëshmi të rreme në formularin e dekriminalizimit, e që sipas ligjit duhet të lerë mandatin”, u shpreh Peza.
“Ky është momenti i të vërtetës”, vijoi ai, duke shtuar se, “ndaj është koha që Prokuroria të nisë sa më parë hetimet, dhe Lulzim Basha të shprehet se çfarë do të bëjë Partia Demokratike me deputetin e saj në shkelje flagarante të ligjit?”./a.m.
