Fati i trajnerit të përfaqësueses së Zvicrës, Vladimir Petkoviç, është pak a shumë i njëjtë me të lojtarëve shqiptarë të Zvicrës. Edhe ai ka lindur në Ballkanin e trazuar nga luftërat – në Bosnjë, por sot bën karrierë të madhe në Zvicër. Për këtë ai thotë se kupton më mirë se kushdo tjetër atë që ndiejnë lojtarët e tij, kur bëhet fjalë për vendlindjen e tyre apo vendin e të parëve.
Kësisoj ai kupton se si do të ndihen lojtarët shqiptarë të Zvicrës, kur do të ndeshen me Shqipërinë në Evropianin “Franca 2016”. Janë plot gjashtë shqiptarë tash për tash në ekipin “helvetik”, ndër të tjerë edhe Granit Xhaka, që do të luajë kundër vëllait të tij më të madh, Taulantit, që ka zgjedhur të përfaqësojë Shqipërinë, shkruan Koha Ditore.
Për këtë dhe rrethana tjera, ndeshja me Shqipërinë pritet të jetë më e zorshmja në aspektin psikik për Zvicrën në kuadër të Grupit A, ku bëjnë pjesë edhe Franca dhe Rumania. Në një intervistë për “Kohën Ditore”, Petkoviç, ka thënë se beson që të përzgjedhurit të tij do të jenë në gjendje të tregojnë profesionalizëm para të gjithave.
“Padyshim, se kjo është një ndeshje shumë e veçantë. Dhe, gjithashtu dua të bëj diçka me dije: Mbi të gjitha kjo nuk është asgjë më shumë sesa një ndeshje futbolli. Këtë nuk duhet ta harrojmë kurrë”, ka thënë Petkoviç për gazetën.
Xherdan Shaqiri, Granit Xhaka, Valon Behrami, Blerim Xhemaili, Admir Mehmedi dhe Pajtim Kasami janë yje të Zvicrës. Petkoviç nuk përjashton mundësinë që deri në Evropian ekipit t’i shtohet edhe ndonjë shqiptar – nëse e dëshmon veten. Ai ka folur edhe për rrugëtimin e këtyre dy skuadrave deri në Francë.
