Është folur shumë për stilin e lojës të Granit Xhakës në “Euro 2016”, por ai bëri bujë të madhe në ndeshjen e tretë në Grupit A kundër Francës kur dy herë iu shqye fanella gjatë dueleve.
Kontributi i Xhakës mund të mos ketë rënë në sy, por ai është njeriu që ka ndihmuar Zvicrën të dominoj përballë Francës në zotërimin e topit prej 59 për qind, transmeton Koha Ditore.
Ka një elegancë të ftohtë mesfushori 23-vjeçar, i cili në dy ndeshjet e para të Zvicrës në “Euro 2016” u zgjodh lojtari më i mirë.
Xhaka ka kontrast të plotë me mesfushorin tjetër, Valon Behrami që luan përkrah tij në mesfushë.
Xhaka, i cili ka ndihmuar Zvicrën të kualifikohet në fazën e nokautit ku do të përballet me Poloninë, është i jashtëzakonshëm në posedimin e topit dhe pasimet e sakta.
Madje, edhe kur është nën presion nga dy apo tre kundërshtarë, Xhaka tregohet efikas.
Ai ka kompletuar 292 pasime në tri ndeshjet e fazës grupore, i dyti pas Toni Kroosit të Gjermanisë, por para Andres Iniestas të Spanjës.
Saktësia e pasimeve prej 92 për qind, e bën Xhakën si lojtarin më të saktë në “Euro 2016” deri më tash, referon Koha Ditore. (b.an)
