Dëshmitari okular i cili ka parë skenën e vrasjes së 25-vjeçarit Klodian Rasha nga efektivi i policisë më 8 dhjetor 2020, Nevaldo Hajdaraj, ka rrëfyer se ngjarja ka ndodhur në pak çaste dhe pas ekzekutimit të të riut, i është kërkuar të largohet nga vendngjarja.
M.A ka treguar se është ndaluar pak minuta para se të bëhej ekzekutimi i Klodian Rashës nga efektivi i forcave shqiponja dhe kolegu i tij, teksa ka qenë duke ardhur nga Dogana në drejtim të Zogut të Zi.
Gazetarja Glidona Daci raporton për Klan News se M.A është ndaluar nga Hajdaraj dhe kolegu i tij pasi kishte kaluar ora policore dhe duhet të jepte llogari për arsyen që kishte dalë në atë orë.
Sipas dëshmisë së M.A, gjithçka ka ndodhur në pak minuta dhe deklaron se gjatë gjithë kohës ka qenë në makinën e tij duke i dhënë dokumentat efektivit tjetër të policisë.
Ai ka parë që ka dalë Klodian Rasha në rrugë dhe është ndjekur nga efektivi i policisë Hajdaraj. Më pas ai ka dalë nga mjeti për të parë çfarë ka ndodhur dhe ka parë 25-vjeçarin të shtrirë në tokë, ndërkohë që ka dëgjuar efektivin tjetër teksa i ka thënë Hajdarajt se përse e qëlloi.
Në pak minuta, sipas tij kanë arritur dhe forca të tjera policore dhe atij i është kërkuar të largohej menjëherë nga vendi i ngjarjes.
Kujtojmë se tashmë janë mbyllur hetimet për dosjen e Klodian Rashës dhe pritet që dosja të shkojë për gjykim në Gjykatë.
/a.r
