Një ditë pas protestës së dhunshme të opozitës ditën e djeshme, ka reaguar edhe ministri i Brendshëm Sandër Lleshaj.
Numri një i Ministrisë së Brendshme theksoi se policia veproi me profesionalizëm, pasi protestuesit përdorën masivisht bomba molotov.
Ai tha se nuk justifikohet dhuna e protestuesve ndaj efektivëve të policisë.
Ministri deklaroi në një konferenc për mediat se nga dhuna e protestuesve u vu në rrezik jeta e efektivëve të policisë.
Ndërkohë që ai ka komentuar dhe arrestimin dhe dhunën ndaj Sahit Dollapit, Sekretarit Organizativ të PD-së, teksa tha se Policia për këtë rast duhet të kishte duruar për pak çaste edhe pse ai bëri rezistencë.
“Bomba molotov, kapsolla, gjatë përpjekjeve për të djegur institucionet, flakët dhe goditjet rrezikuan seriozisht punonjësit e policisë. Sulmet e djeshme u përballuan falë përkushtimit dhe profesionalizmit të panjohur më parë të Policisë së Shtetit. Ata burra e gra meritojnë respekt dhe vlerësim. Për orë të tëra përballuan qindra bomba molotov e qindra mjete të tjera. Dhe ata që u angazhuan në ndalim e Sahit Dollapit, të kishin bërë diçka ndryshe. Të kishin duruar dhe pak sekonda në ndalimin e personit në fjalë… Por nuk mund të justifikohet histeria e zjarrit që u derdh mbi institucionet. U bëj thirrje të gjithëve për reflektim të thellë ndaj përpjekjeve për destabilizim“, tha ministri.
Lleshaj tha se me protesta të dhunshme opozita nuk do të bllokojnë dot reformën në drejtësi dhe hapjen negociatave.
“Me protesta të dhunshme nuk do të bllokoni dot reformën në drejtësi dhe hapjen negociatave. Dhunuesit do të marrin përgjigjen e duhur”- tha Lleshaj.
g.kosovari
