Reshjet e dendura të shiut kanë shkaktuar përmbytje të shumta në qytetin e Durrësit dhe zonat përreth, duke vënë në vështirësi qindra familje. Ndër zonat më të prekura janë ish-Këneta, Shkozeti dhe zona e Ish-Tullës, të cilat përmbyten pothuajse çdo herë gjatë reshjeve intensive.
Në zonën e ish-Kënetës, familjet janë evakuuar, ndërsa uji ka arritur deri në një metër lartësi, duke shkaktuar dëme të konsiderueshme materiale. Të gjitha orenditë shtëpiake janë nën ujë.
“Jemi pesë anëtarë në familje. Të tjerët u larguan, unë qëndrova sepse nuk e dija çfarë do të ndodhte. Që dje në orën 10 të mëngjesit shtëpia është e përmbytur plotësisht,” shprehet një banor për mikrofonin e RTSH.
Një tjetër familje nga e njëjta zonë ka gjetur strehim te të afërmit, pasi banesa është e pajetueshme.
“Nuk kemi ku të rrimë as për t’u ulur, çdo gjë është nën ujë. Të gjithë banorët janë larguar. Tubat nuk zhbllokohen kurrë dhe nuk merren masa, vetëm vijnë dhe shohin, por zona e ish-Kënetës mbetet e braktisur,” tha një banor tjetër.
Situatë e vështirë paraqitet edhe në fshatin Borç, në Sukth, ku uji ka hyrë në katet e para të banesave dhe në oborret e shtëpive.
“Jemi me fëmijë të vegjël dhe nuk dimë ku të rrimë. Sa herë ka reshje, këtu ndodhin përmbytje. Askush nuk vjen të pastrojë kolektorët,” shprehet një banor.
Sipas autoriteteve, në Durrës janë rreth 800 banesa me prezencë uji, ndërsa 180 banorë janë evakuuar dhe janë sistemuar në dy konvikte. Për shkak të përmbytjeve dhe bllokimit të rrugëve, është pezulluar edhe mësimi në disa shkolla, pasi uji ka hyrë në oborret e tyre.
Situata vijon të mbetet problematike, ndërsa banorët kërkojnë ndërhyrje të menjëhershme dhe zgjidhje afatgjata për parandalimin e përmbytjeve të përsëritura.
