Kryetari i Partisë Balli Kombëtar, Adriatik Alimadhi dhe kreu Partisë Aleanca Demokratike, Eduart Abazi, u shprehën për Shqiptarja.com se kanë çuar pranë KQZ dokumentacionin ligjor për t’u regjistruar në zgjedhje, duke konfirmuar kësisoj pjesëmarrjen në garën e 18 Qershorit.
Po ashtu, krerët e 10 partive të djathta, aleate të Partisë Demokratike, thanë se do të referojnë dokumentet në KQZ brenda afatit të parashikuar në Kodin Zgjedhor. Por, ndryshe nga shumica e aleatëve, kryetari i Partisë Demokristiane, Nard Ndoka, pohoi për Shqiptarja.com se ende nuk ka një vendim nga opozita për regjistrimin në zgjedhje.
“Për regjistrimin në zgjedhjet e 18 Qershorit do të ketë një vendim të opozitës, por nuk do të ketë zgjedhje në 18 Qershor pa opozitën dhe me këtë qeveri”, tha Ndoka, në linjën e kryetarit të Partisë Demokratike, Lulzim Basha.
Krerët e Partisë Demokratike kanë paralajmëruar publikisht ne nuk do të ketë zgjedhje në 18 Qershor me Edi Ramën kryeministër dhe Saimir Tahirin në krye të Ministrisë së Brendshme, pra pa krijimin e një qeverie me bazë të gjerë, me pjesëmarrjen e opozitës.
Paralajmërimi ultimativ i partisë kryesore në opozitë nënkupton së pari delegjitimimin e zgjedhjeve përmes bojkotit dhe së dyti prishjen e zgjedhjeve përmes tërheqjes së komisionerëve, bllokimit të qendrave të votimit apo edhe formave të tjera. Por, secili skenar mbart një rrezik për Partinë Demokratike. Së pari, në rast bojkoti, rolin e Partisë Demokratike mund ta luajnë disa parti tradicionale të djathta në zgjedhje, të cilat kanë sinjalizuar pjesëmarrjen në zgjedhje, por edhe parti të tjera me peshë në elektorat.
Së dyti, një dështim i mundshëm i tentativës për të prishur zgjedhjet, mund të shënojë fundin e ciklit politik të Partisë Demokratike, skenar i cili është reflektuar si shqetësim edhe nga deputeti Aldo Bumçi. Nga ana tjetër regjistrimi i disa aleatëve të Lulzim Bashës në zgjedhje mund të konfirmojë edhe planin e Partisë Demokratike për t’u regjistruar brenda afatit ligjor, pavarësisht kushtit për qeveri teknike.
Në datën 10 prill do të marrin fund dilemat dhe paqartësisë lidhur me pjesëmarrjen e Partisë Demokratike në zgjedhje, gjithnjë nëse deri atëherë nuk do të ketë një zgjidhje për adresimin e kërkesave të opozitës. Pika 1 i nenit 64 të Kodit Zgjedhor parashikon që çdo parti politike duhet të paraqesë kërkesën për t’u regjistruar si subjekt zgjedhor në KQZ jo më vonë se 70 ditë përpara datës së zgjedhjeve. Neni 64 parashikon edhe dokumentacionin edhe dokumentacionin që partitë duhet të paraqesin për t’u regjistruar.
Afati për regjistrimin në zgjedhje
Neni 64
Regjistrimi i partive politike në zgjedhje
1. Çdo parti politike duhet të paraqesë kërkesën për t’u regjistruar si subjekt zgjedhor në KQZ jo më vonë se 70 ditë përpara datës së zgjedhjeve.
2. Për t’u regjistruar si subjekt zgjedhor për çdo lloj zgjedhjeje, një parti politike duhet të paraqesë në KQZ:
a) vërtetimin që partia është regjistruar në Gjykatën e Rrethit Gjyqësor, Tiranë;
b) emrin, mbiemrin dhe adresën e kryetarit të partisë, i cili është personi i autorizuar për të paraqitur kandidatët;
c) emrin zyrtar, shkronjat nistore dhe adresën e partisë;
ç) specimenin e vulës së partisë;
d) emrin, mbiemrin dhe adresën e financierit të partisë; dhe
dh) emrin, mbiemrin dhe adresën e personit përgjegjës për komunikimin me KQZ-në.
