Dy persona që po hetoheshin nga Prokuroria e Krimeve të Rënda për një gjobëvënie në qytetin e Vlorës, kanë kryer një bisedë telefonike, nga e cila prokuroria dhe policia kanë kuptuar se bëhej fjalë për një trafik të mundshëm droge. Çështja është mbajtur në monitorim të vazhdueshëm nga hetuesit, të cilët ditën e dielë arritën ti binin në gjurmët e trafikantëve.
Një burim pranë prokurorisë i tha gazetës “Shqiptarja.com” se rasti i zbulimit të 1 ton drogë ka ardhur si rezultat i hetimeve dhe përgjimeve, për një çështje paralele. “Bëhet fjalë për një dosje gjobëvënie që kemi ende në trajtim.
Teksa hetonim këtë dosje, ne konstatuam disa biseda të dyshimta, ku personat që dyshonim për gjobëvënie na krijonin dyshime se mereshin edhe me aktivitet droge. I kemi vëzhguar për një periudhë kohë derisa sa vendosëm të ndërhynim duke sekuestruar dhe sasinë e drogës”-thanë burimet pranë prokurorisë.
Tre në kërkim
Aktualisht prokuroria dhe policia ka përqëndruar hetimet në lokalizimin dhe arrestimin e tre personave që prej së dielës janë shpallur në kërkim. Ndërkohë hetime po kryhen edhe për identifikimin e bashkëpuntorëve të tjerë. Shtetasit G.S., A.I., J.S janë të përfshirë në këtë veprimtari kriminale të trafikimit të lëndëve narkotike, dhe janë shpallur në kërkim nga ana e Policisë.
Tre personat janë larguar me një mjet lundrues drejt portit të Vlorës thuhet në raportin e policisë, dhe qëndronte rreth 30 metra larg bregut të detit. Trafikantët arritën ti largoheshin ndjekjes së policisë, ndërsa u sekuestrua lënda narkotike dhe baza ku ata qëndronin. Së bashku me drogën u kapën edhe 6 armë zjarri të kalibrave të ndryshëm. Hetimet janë në proces verifikimi edhe nga kontrolli i brendshëm i policisë së shtetit, pasi dyshohet se ka pasur dekonsperim nga uniformat blu.
49 pako të mëdha
Rreth orës 01:00 të datës 10 shtator 2017, në Plazh të Vjetër, në lagjen “1 Maji” rreth 30 m larg nga Porti i Vlorës, efektivët e Seksionit për Hetimin e Narkotikëve në Drejtorinë Vendore të Policisë Vlorë, në bashkëpunim me Prokurorinë e Krimeve të Rënda Tiranë, me repartin special “Delta Forcë”, me DVKM Vlorë dhe me GdF, nisur nga një hetim me metoda speciale për evidentimin dhe parandalimin e trafikimit të lëndëve narkotike, kanë finalizuar një tjetër operacion antidrogë të koduar “Plazhi i vjetër”.
Në një banesë private të pabanuar, janë gjetur dhe sekuestruar 49 pako të mëdha të mbështjella me natriban ku brenda tyre kishte lëndë narkotike të dyshuar “Cannabis Sativa”, me peshë totale 1030 kilogramë.
Gjithashtu gjatë kontrollit në këtë banesë u gjetën dhe u sekuestruan edhe 6 armë zjarri, nga këto 3 armë Kallashnikov dhe 3 armë Pistoleta, si dhe municion luftarak. Në afërsi të banesës në det, ndodheshin tre persona me një gomone të cilët ishin përgatitur për të transportuar lëndën narkotike drejt Italisë.
Në momentin që ka ndërhyrë Policia të tre personat G.S., A.I., J.S., janë larguar me shpejtësi të madhe me gomone në hapsirën detare.
