Lajmi i arrestimit të trajnerit të kombëtares së femrave të Shqipërisë, Armir Grima, ish-futbollist, kapiten dhe drejtor i Vllaznisë Armir Grima tronditi botën e futbollit.
Emri i tij 13 muaj më parë u lidh me një nga grupet më të rrezikshme kriminale në vend, si banda e Bajreve të Shkodrës.
Në një rrëfim për Top Channel, Armir Grima dhe familja e tij tregojnë vitin e errët për ta.
Ndeshja mes Vllaznisë B dhe Tërbunit të Pukës, një përballje e kategorisë së parë e cila ishte e vlefshme për qëndrimin në kategori të skuadrës fituese, nxori fituese ekipin shkodran me rezultatin 2-1.
Por gjatë këtij takimi Armir Grima ka marrë dy nga 3 telefonatat e Safet Bajrit, një nga anëtarët kryesor të bandës së Bajreve të arrestuar, në operacionin e koduar “Oaz”.
Bëhej fjalë për një përgjim që zgjati vetëm 12 sekonda.
Grima tha se pavarësisht atij përgjimi, ai nuk kishte lidhje dhe as kishte kryer ndonjë vepër penale.
Vendimi i Gjykatës për pafajësinë e Armir Grimës është pasuar menjëherë edhe me rikthimin e tij në detyrë si trajner i ekipit të Kombëtares për femra të Shqipërisë.
