Pas rëndësisë dhe peshës mediatike e politike që ka marrë cështja e pajisjes së përgjimit dhe nëse ajo është përdorur nga policia e shtetit, ka reaguar edhe Edi Rama përmes një statusi në rrjetin e tij social. Kryeministri i referohet daljes së sotme të Lulzim Bashës dhe kërkesës së deputetëve të opozitës për të thërritur në komisionin parlamentar të sigurisë Ministrin Tahiri, kreun e Policisë Haki Çako, Visho Ajazin e SHISH e kryeprokurorin Llalla.
Rama shkruan se Reforma në drejtësi është bërë hall i madh për opozitën e cila tashmë është bërë paranojake dhe kujton se është duke u përgjuar.
“Hall i madh Reforma ne Drejtesi tani u behet edhe sikur i pergjojne”- shkruan Rama në rrjetin social
Disa orë më parë, kryetari i PD Lulzim Basha tha se pajisja është në duart e policisë e cila po e përdor atë për të përgjuar opozitën, Presidentin dhe madje edhe ambasadorët e disa prej vendeve më të rëndësishme.
Ditën e djeshme ka qenë ish kryeministri Berisha i cili nxorri një listë të perosnave që sipas tij po përgjohen nga kjo pajisje përgjimi.
Sakaq, vetë Ministri Tahiri ka hedhur poshtë aludimet e opozitës se një pajisje e tillë po përdoret nga qeveria për të përgjuar.
“Policia nuk disponon as nuk ka disponuar një pajisje të tillë se nuk i lejohet. Policia bashkë me partnerët nuk ka punuar dhe s’do punojë me një pajisje të tillë pasi është e jashtligjshme. Ndërkohë më duhet t’ju sqaroj se policia po kryen një trajnim në bashkëpunim dhe marrëveshje me disa vende të Europës e konkretisht me Italinë. Kjo marrëveshje ka të bëjë me punën e trajnimin me një pajisje normale që nuk ka të bëjë me përgjimin.“- tha Tahiri.
javanews, a.k
