Sipas të dhënave, që në vitin 2016 prokuroria ka lidhur marrëveshje me disa kompani të huaja për të blerë pajisje përgjimi dhe procedura do të zgjasë deri në vitin 2019. Vetëm në vitin 2016, prokuroria ka shpenzuar 94.500.000 lekë të reja.
Faza e parë është mbyllur në fund të 2016 dhe pajisjet janë siguruar. Por blerja e pajisjeve të përgjimit ka vijuar edhe gjatë vitit 2017 dhe janë shpenzuar 50 milionë lekë të reja, ose 500 milionë lekë të vjetra.
Pajisjet janë blerë në katër mujorin e parë të vitit dhe sipas informacioneve janë pajisje të modeleve të fundit. Në total fondi që do përdoret deri në 2019 është 195.987.000 lekë, ose rreth 2 miliardë lekë të vjetra.
Nga shqetësimet që janë ngritur më herët nga prokuroria dhe Shërbimi Informativ i Shtetit, pajisjet që janë përdorur deri më tani janë të vjetra dhe nuk kanë pasur mundësi që të bëjnë përgjime në celularët e modeleve të fundit, apo dhe në rrjete sociale.
Por sipas burimeve, organi i akuzës ka marrë pajisje përgjimi, programe dhe materiale të tjera moderne, përmes të cilave do zbërthehen kompjuterët dhe celularët e individëve të dyshuar për lidhje kriminale.
Sipas informacioneve pajisjet e përgjimit janë blerë dhe në kuadër të reformës në drejtësi shkruan “Sot”. Prokuroritë do kenë një rëndësi shumë të madhe në këtë aspekt dhe pritet që me ngritjen e SPAK dhe realizimin e vetingut të gjithë pushtetarët të kalojnë në sitë.
Deri në 2019 pritet që të jenë blerë të gjitha pajisjet, edhe pse pjesa më e madhe e fondit është shpenzuar që tani. Vendi ynë është përfshirë në shumë raste në skandale përgjimi. I pari ishte ai i SHISH, ku ishin përgjuar Edi Rama e Ilir Meta.
Ndërsa rasti tjetër ishte ai i pajisjes së përgjimit të policisë, ku dyshohet se u përgjuan me dhjetëra zyrtarë. Tani edhe prokuroria do ketë kapacitet të fortë për të përgjuar këdo që është i dyshuar.
Gjatë vitit 2016, rreth 4000 persona janë përgjuar me kërkesë të Prokurorisë si të dyshuar për kryerjen e veprave penale si trafiqe të paligjshme, akte terroriste apo edhe korrupsion.
Shifra bëhet publike nga Prokuroria e Përgjithshme, e cila në raportin vjetor të saj e konsideron përgjimin e komunikimeve elektronike në hetimet paraprake si mjet për kërkimin e provës për të luftuar krimin dhe për të parandaluar rreziqe që i kanosen sigurisë kombëtare.
Organi i akuzës bën me dije se në sajë të kësaj teknike hetimore është arritur në arrestimin në kushtet e flagrancës të 509 personave të dyshuar për terrorizëm, vrasje, trafikim të lëndëve narkotike, korrupsion, trafikim të armëve, e vepra të tjera, duke parandaluar kështu pasoja të rënda për jetën dhe sigurinë kombëtare.
Në disa raste të tjera mbi të dhënat e përfituara gjatë interceptimit, është mundësuar regjistrimi i procedimeve penale kryesisht për veprën penale të korrupsionit të personave që kryejnë funksione publike.
Në shifra të përgjithshme, gjatë vitit 2016 janë ekzekutuar gjithsej 2283 vendime për lejimin e përgjimit aplikuar në lidhje me 676 procedime penale, marrë këto nga prokurorët në kushtet e emergjencës si dhe vendime të autorizuara nga gjykata në hetimet paraprake.
Për sa më sipër është mundësuar interceptimi për 3943 persona të dyshuar si të përfshirë në vepra të rënda penale.
ma.me
