“Jemi këtu dhe po ikim në Tropojë. Lajmëroje Lalën dhe të mos e marrë vesh njeri. As punëtorëve të mos u thotë. Na kanë nisur urgjent me porosi për tjetër vend. Të marr në telefon kur të jem afër, ose më mirë lajmëroje që tani”. Kjo është vetëm një nga bisedat e përgjuara të inspektorëve të Njësisë Mbikëqyrëse të Lojërave të Fatit, të cilët janë vënë nën akuzë pasi favorizonin biznese të ndryshme që ushtronin veprimtari të palicencuar.
Biseda e përgjuar, është realizuar mes një punonjësi të Njësisë me shtetasin Petrit Ahmetaj, i cili akuzohet nga prokuroria se në shumë raste bashkëpunonte me inspektorët, për të shmangur kontrollet tatimore, që ushtronin veprimtari të paligjshme. Nga hetimi, rezulton se pas kësaj telefonate, Ahmetaj menjëherë ka telefonuar të pandehurin Ymer Hoxha dhe i ka çuar “mesazhin” që i është dhënë nga zyrtarët e Njësisë, pra që të mbyllte biznesin e tij, pasi do të kishte kontrolle.
Bisedat e përgjuara, janë prova kryesore që prokuroria do të përdorë në procesin gjyqësor që do të fillojë brenda pak ditësh në Gjykatën e Tiranës, ku të pandehur janë inspektorë të Njësisë së Lojërave të Fatit dhe pronarë të disa ambienteve, ku ushtrohej veprimtari e palicencuar në këtë fushë. Më poshtë, një pjesë e dosjes së prokurorisë….
Përgjimet telefonike
Nga hetimet ka rezultuar se nga punonjësit e Njësisë së Mbikëqyrjes së Lojërave të Fatit është ushtruar kontroll në qytetin e Tropojës më datë 26.12.2014. Nga bisedat e transkriptuara rezulton se njëri nga punonjësit e Njësisë së Mbikëqyrjes, nga numri xxxx154, ka marrë në
telefon Petrit Ahmetajn, në numrin xxxx786, dhe, pasi e informon se janë për kontroll të subjekteve të lojërave të fatit në Tropojë, i thotë që të informojë subjektin Ymer Hoxha, që ta mbajë dyqanin mbyllur. Më konkretisht ndër të tjera i thotë: “Jemi këtu dhe po ikim në Tropojë. Lajmëroje lalën dhe të mos e marrë vesh njeri. As punëtorëve të mos u thotë. Na kanë nisur urgjent me porosi për tjetër vend. Të marr në telefon kur të jem afër, ose më mirë lajmëroje që tani”.
Pasi ka përfunduar telefonatën me punonjësin e Njësisë së Mbikëqyrjes së Lojërave të Fatit, Petrit Ahmetaj ka kontaktuar një person, i cili përdor numrin xxxxx550, të cilin e ka njoftuar për kontrollin e befasishëm që po ushtrohet dhe e ka këshilluar që ta mbajë lokalin mbyllur. Petrit Ahmetaj i thotë personit që telefonon: “Janë nisur për një aksion blic andej nga Tropoja. Më tha dikush me të njoftu ty për me e mbyll sikur ke problem me dritat. Mos e mbyll kështu se i prishet punë atij tjetrit”.
Nga hetimet e kryera më pas, ka rezultuar se personi i kontaktuar nga i pandehuri Petrit Ahmetaj është shtetasi Ymer Hoxha, i cili ka pasur në administrim një lokal lojërash fati të paregjistruar në organet tatimore, për të cilin po heton prokuroria. Gjatë hetimit janë konstatuar edhe raste të tjera ku i pandehuri Petrit Ahmetaj bashkëpunon me inspektorët e Njësisë Mbikëqyrëse të Lojërave të Fatit, për të shmangur kontrollet tatimore, në disa subjekte që ushtrojnë veprimtari të palicencuar. /Gazeta Shqiptare
