Nisin hetimet për të mësuar më shumë se si Wikileaks përvetësoi dhe publikoi disa dosje të CIA-s. Në hetim do të përfshihet FBI dhe të tjera agjenci ligjzbatuese. Zëdhësi i Shtëpisë së Bardhë ka deklaruar se Presidenti Trump është i vendosur për të çuar përpara drejtësisë autorët, ndërsa sa i përket vërtetësisë së materialeve të publikuara ai nuk ka dhënë asnjë deklaratë.
“Mendoj se Presidenti e ka bërë të qartë edhe kur ka folur më herët se çdokush që do të lejojë vjedhjen e informacioneve të klasifikuara do të gjykohet nga shkallët më të larta të drejtësisë. Ne do t’i ndjekim penalisht këta individë dhe do t’i dërgojmë përpara gjykatave. Kësaj i thonë të luash me sigurinë tonë kombëtare dhe nuk është dicka që do të kalohet lehtë nga administrata jonë” u shpreh zëdhënësi i Shtëpisë së Bardhë, Shon Spicer.
Në dosjet e publikuara nga Wikileaks, kishte informacion se CIA ka arritur që të krijojë programe mjaft të avancuara dekodimi që i japin mundësi të përgjojë çdo lloj paisje teknologjike, duke filluar nga Smartphonët e kompanive më të njohura, e deri tek televizorët smart, të cilët mund të përdoreshin edhe si përgjues. Mbetet për tu parë se cili do të jetë rezultati i hetimeve.
