Tani që po kalon kjo verë e nxehtë, duhet të përgatitemi për dimrin e ftohtë të shoqëruar me shumë sfida, duke filluar nga Covidi, ftohjet, gripi etj.
Kujdesi për trupin dhe sistemin imunitar nuk kërkon ndonjë mundim të madh, duhet të dini vetëm disa këshilla mjaft të vlefshme.
Një mjek i specializuar i quajtur Michael Mosley ka ndarë me të gjithë hapat apo këshillat për të qëndruar pozitivë dhe të shëndetshëm.
Hani çokollatë
“Jam i kënaqur që kam hasur hulumtime që tregojnë se ngrënia e çokollatës së zezë çdo ditë mund të ketë efekte klinikisht të rëndësishme në presionin e gjakut dhe shëndetin e zemrës. Komponimet e dobishme janë flavonoidet, por për të qenë efektive çokollata duhet të jetë e errët dhe të përbëhet nga të paktën 75% kakao”.
Këndoni sa më shumë
“Më pëlqen të këndoj, edhe pse këndoj skandal. Por nuk kam dyshim se është mirë për mua. Siç më ka thënë dhe Dr Daisy Fancourt, një profesoreshë e asociuar e psikobiologjisë dhe epidemiologjisë në University College London, këndimi jo vetëm që zvogëlon hormonet e stresit, të tilla si kortizoli, por gjithashtu zvogëlon inflamacionin kronik, të lidhur me depresionin.
Këndimi gjithashtu rrit endokanabinoidet, kimikate të ngjashme me kanabisin që trupi juaj prodhon natyrshëm”.
Merrni më shumë rreze dielli
“Drita e diellit është një shpatë me dy tehe. Përmirëson gjendjen shpirtërore, ul presionin e gjakut dhe na jep vitaminë D, një hormon që luan një rol jetësor në mbrojtjen nga viruset siç është Covid-19. Por ekspozimi i tepërt shkakton kancer të lëkurës.
Sidoqoftë, dalja për pak kohë jashtë në mes të ditës, mund të maksimizojë prodhimin e vitaminës D (e cila prodhohet në lëkurë si rezultat i ekspozimit në diell).
Nëse jeni relativisht me lëkurë të zbehtë si unë, atëherë ju vetëm duhet të përveshni mëngët dhe pantallonat dhe të qëndroni për rreth dhjetë minuta. Nëse jeni me lëkurë më të errët mund t’ju duhen rreth 25 minuta. Keni kohë deri në Tetor për të marrë sa më shumë vitaminë D sepse rrezet deri në atë muaj nuk janë më aq të forta”.
Ndryshoni oraret e ushqimit
Ngrënia e kufizuar në kohë, me fjalë të tjera, zgjatja e agjërimit tuaj brenda natës në të paktën 12 orë duke ngrënë mëngjesin tuaj pak më vonë dhe duke përfunduar vaktin tuaj të mbrëmjes pak më herët ka përfitime të shumta.
Njerëzit në përgjithësi hanë më pak, gjë që çon në humbje peshe dhe gjumë më të mirë, dhe fakti që ju nuk hani aq afër gjumit, trupi juaj është më i aftë të përpunojë ushqimin që keni konsumuar.
Luaj video-lojëra
“Unë gjithmonë kam menduar se video-lojrat ishin humbje kohe, kështu që u befasova kur nga hulumtimet zbulova që kishte përfitime për trurin dhe vizionin tonë nëse luanim disa orë në javë.
Sipas Profesores Daphne Bavelier, një neuroshkencëtare në Universitetin e Gjenevës, lojërat kompjuterike jo vetëm që përmirësojnë kujtesën e punës (aftësinë tuaj për të mbajtur më shumë se një gjë në kujtesën tuaj në të njëjtën kohë), por edhe aftësinë tuaj për të kryer shumë detyra. Lojërat me veprim dhe vendimmarrje të shpejtë duket se janë më të mirat”.
Rrisni sa më shumë bimë brenda ambientit ku jetoni
Të kesh disa bimë shtëpie përreth mund të ndihmojë në pastrimin e ndotësve të ajrit. Këto çlirohen nga materialet e ndërtimit, orenditë, produktet e pastrimit dhe janë lidhur me sulmet e astmës.
Pini ujë
Dhimbja e kokës, lodhja dhe të menduarit janë të gjitha shenja të dehidratimit. Për një studim ne i kërkuam një vullnetari të pinte një gotë uji në çdo vakt dhe kjo gjë ndikoi shumë pozitivisht. Një nga mënyrat më të mira për të treguar nëse jeni duke pirë mjaftueshëm është të shikoni urinën tuaj. Duhet të jetë me ngjyrë kashte dhe duhet të shkoni pesë ose gjashtë herë në ditë.
Ngrihuni më shumë
Qëndrimi ulur për periudha të gjata kontribuon në obezitetin, diabetin e tipit 2 dhe sëmundjet e zemrës. U zbulua se kur ata ishin në këmbë, pastruan sheqerin nga gjaku i tyre shumë më shpejt. Edhe shëtitja për disa minuta çdo gjysmë ore mund të ndihmojë vërtet./m.j
