Në nisje të fjalës së tij gjatë konferencës për shtyp, ministri i Punëve të Jashtme, Ditmir Bushati, falenderoi homologun e tij grek për vizitën. Sipas Bushatit, të dy vendet kanë mbi një vit që po punojnë për të gjetur zgjidhje mbi disa çështje që lidhe me ligjin e Luftës dhe të ardhmen europiane.
“Kemi një partneritet dhe interes strategjik. Gjatë periudhës së fundit sëbashku me mikun tim Nikos Kotzias kemi këmbyer disa ide për të arritur në një platformë të përbashkët për të zgjidhur çështjet dypalësh. Dua t’ju njoftoj se sot kemi rënë dakord për një mekanizëm të përbashkët sesi do t’i adresojmë këto çështje” – tha ndër të tjera Bushati.
Sipas kryediplomatit shqiptar, kur propozimet e Kotzias krahasohen me ato të vendit tonë shihet se ka pika të përbashkëta dhe vullnet për të ecur përpara.
I pyetur nëse në tavolinë është diskutuar për çështjen çame, Ditmir Bushati tha se ai respekton pikëpamjet e ndryshme që kanë me njëri tjetrin.
“Çështja çame e ka origjinën në luftën e Dytë Botërore. Është normale edhe për shkak të gjaknxehtësisë që kanë ballkanasit, të kemi pikëpmaje të ndryshme. Besoj se është e drejtë të sqarojmë se nuk bëhet fjalë për pretendime territoriale. Shqipëria nuk ka pretendime ndaj Greqisë. Ne e respektojmë si fqinj dinjitoz dhe për mbështetjen e integrimit që na ka dhënë. Kur flasim për çështjen çame ka të bëjë me respektimin e të drejtave të shqiptarëve që ishin me pasaporta greke” – tha Bushati.
Ministri i Jashtëm i Shqipërisë tha se ka shembuj pozitivë për zgjidhje duke sjellë në vëmendje praktikën gjermano-franceze.
Ndërkohë, në lidhje me ligjin e Luftës, ministri grek theksoi se Greqia beson se me deklaratën e Këshillit të Ministrave të 1987, ne nuk jemi në luftë dhe kjo është e vërtetë.
“Marrëveshja e miqësisë në 1996 mes dy vendeve është tregues tjetër që nuk jemi në luftë. Pjesëmarrja në NATO na bën jo vetëm miq, por edhe partner. Nëse Shqipëria ka dyshime, do të gjejmë një zgjidhje të kënaqshme. Sa i përket çështjes çame, është e ditur që kemi një numër shumë të lartë çamësh që jetojnë në Greqi dhe uroj që të përfitojnë nga anëtarësimi i Shqipërisë në BE| – tha Kotzias.
Ministri grek tha se ka disa çamë që kanë bashkëpunuar me pushtuesin gjermanë duke marrë pjesë në komisionet e kontrollit dhe që punuan për plaçkitje dhe krime.
“Duhet të kemi kujdes kur flasim për këta çamë se nuk nënkuptojmë asnjë grup shqiptarësh, veçanërisht nuk nënkuptojmë Shqipërinë. E them disa sepse disa duan të barazojnë bashkëpunëtorët e gjermanëve me shqiptarët që jetonin në Shqipëri” – tha Nikos Kotzias.
Sa i përket çështjes së kufirit detar me Greqinë, ministri Bushati tha se faktet janë të qarta pas vendimit të Gjykatës Kushtetuese.
“Duhet të nxjerrim mësime nga gabimet që ka bërë pala shqiptare. Gjykata Kushtetuese ka folur qartë për cënim të integritetit territorial të Shqipërisë. Ne jemi të vendosur për të ecur përpara me palën greke në frymën evropiane dhe në rregullat ndërkombëtare. Unë përfaqësoj një parti dhe një qeveri që nuk ka ndërmend të bëjë gabime të tilla” – tha ministri i Jashtëm i Shqipërisë.
“E vetmja deklaratë që kam bërë për Shqipërinë është se e dua në Bashkimin Evropian dhe do ta ndihmoj me aq sa kam mundësi. Është tjetër gjë deklarata e ministrisë së Jashtme dhe tjetër gjë deklarata e ministrit” – tha Nikos Kotzias.
I pyetur nga gazetarja greke në lidhje me çështjen çame si strekëmbësh që pengon dialogun, Ditmir Bushati u përgjigj se nuk ka asnjë pengesë nga ana e Shqipërisë.
“Ky është një dialog i sinqertë mes dy vendeve fqinje që kanë qëndruar dhe do qëndrojnë sëbashku në kohë të mira dhe të këqija” – u shpreh ministri Bushati/
(java / r.a)
