Një britanik që tentoi të trafikonte 17 emigrantë shqiptarë në Britaninë e Madhe është dënuar me katër vite e nëntë muaj burg.
Stephen Jackson, sipas hetuesve u kishte marrë shqiptarëve që ishin dëbuar më parë nga Britania nga 7 mijë paund secilit. Mes tyre ishte dhe njëri i larguar pasi ishte dënuar për prostitucion.
51-vjeçari gjithashtu rezultoi se kërkohej dhe në Spanjë për zhdukjen e një gruaje.
Gjykatësi tha se shqiptarët ishin transportuar në kushte të rrezikshme për jetën.
51-vjeçari u kap në brigjet e Britanisë më 23 maj të këtij viti. Fillimisht ai u ndalua pasi rezultoi se kërkohej nga drejtësia spanjolle, shkruan panorama.
Ndërsa gjatë kontrollit në bordin e jahtit u gjetën 17 shqiptarë të moshës 20 deri në 44 vjeç.
Por, avokati i britanikut deklaroi se Jackson kishte marrë vetëm dy mijë paund për të trafikuar një familje shqiptare nga Franca në Britani dhe nuk e dinte se bëhej fjalë për 17 persona.
