Anija e parë me grurë që transportohet nga Ukraina që nga pushtimi i Rusisë ka mbërritur në ujërat turke dhe ka përfunduar inspektimet.
Me 26,000 ton misër, anija Razoni u inspektua nga zyrtarë nga Rusia, Ukraina, Turqia dhe OKB-ja. Është e paqartë se sa shpejt anija do të jetë në gjendje të lundrojë për në Liban, destinacioni i saj përfundimtar.
Rusia ka bllokuar portet e Ukrainës që kur pushtoi vendin në shkurt, duke intensifikuar mungesën globale të ushqimit.
Sipas kushteve të një marrëveshjeje të ndërmjetësuar nga Turqia dhe OKB muajin e kaluar, të dyja palët kanë rënë dakord që transporti i grurit mund të rifillojë.
Ukraina tha se anijet e saj detare do të udhëheqin ngarkesat nëpër ujërat që janë minuar.
Përveç lehtësimit të mungesës së ushqimit gjetkë, Presidenti Volodymir Zelensky tha se shpreson që eksportet do të inkurajonin fermerët ukrainas të mbjellin fara për sezonin e ardhshëm.
“Kjo është një çështje e sigurisë ushqimore edhe për vendin tonë, tani po sigurojmë vitin e ardhshëm”, tha ai.
Razoni u largua nga porti ukrainas i Odesa të hënën, duke u nisur për në Tripoli në Liban nëpërmjet ujërave turke.
Anija me flamurin e Sierra Leone tani është inspektuar për mallra të ndaluara dhe mund të kalojë tranzit përmes ngushticës së ngushtë të Bosforit, sipas ministrisë turke të mbrojtjes.
Autoritetet ukrainase thonë se janë 17 anije të tjera me grurë që presin të largohen nga portet e vendit të Detit të Zi pasi Razoni të përfundojë udhëtimin e tij të sigurt. Marrëveshja midis Rusisë dhe Ukrainës, e ndërmjetësuar në fund të korrikut pas dy muaj negociatash, u vu në dyshim kur Rusia lëshoi dy raketa në portin e Odesës më pak se 24 orë pas shpalljes së marrëveshjes.
Marrëveshja pritet të zgjasë 120 ditë dhe mund të rinovohet nëse të dyja palët bien dakord.
/e.d
