Grupi i eksperteve për reformën në drejtësi ka përmbyllur takimin për miratimin e draftit pasditen e së hënës në Kryesinë e Kuvendit për të dhënë versionin përfundimtar të draftit pa përfaqësuesit e opozitës.
Përfaqësuesi i mazhorancës, eksperti për reformën në drejtësi, Sokol Sadushi, deklaroi në një prononcim për mediat se “Drafti ka marrë formën përfundimtare dhe ne te janë marre parasysh edhe propozimet e opozitës dhe eksperteve të ministrisë së Drejtësisë. Drafti është gati për t’u dorëzuar në Komisionin e Venecias”.
Sadushi theksoi se “Puna me ekspertët e nivelit të lartë vazhdoi pa përfaqesuesit e opozitës”.
Ndërsa përfaqesuesi i opozitës, eksperti për reformën në drejtësi, Enkelejd Alibeaj, në një prononcim për mediat u shpreh se “Drafti duhet të ishte përmbyllur me konsensues dhe me përfaqësinë e palëve”. Sipas tij, “kjo mënyrë e miratimit të draftit pa opozitën dhe jashtë konsensuesit është kapje e sistemit të drejtësisë”.
