Kreu i Lëvizjes Besa, Bilall Kasami zhvilloi mbrëmjen e të martës një takim me kreun e qeverisë maqedonase Zoran Zaev. Një takim për të cilin shumë media të këtij vendi kanë ngritur dyshime se është biseduar për një afrim të mundshëm në qeveri të dy deputetëve të fraksionit të Kasamit, brenda lëvizjes Besa tashmë të ndarë. Por në përfundim të takimit, Kasami mohoi të ishte diskutuar për këtë çështje.
Në një konferencë të menjëhershme për shtyp, Kasami foli publiksht për përçarjet në parti. Ai tha se Lëvizja Besa vijon të drejtohet prej tij deri në kongresin e Shkurtit. Kasami shpjegoi se mbledhja e të shtunës në Shkup ishte e jashtëligjshme dhe se shumica e pjesëmarrësve nuk ishte pjesë e kryesisë së partisë.
Përçarja e partisë në dy fraksione u shfaq të shtunën, kur grupi i kryetarit Bilall Kasami dhe ai i ish-nënkryetarit Zeqirja Ibrahimi zhvilluan mbledhje të ndara të kryesisë. Nga 5 deputetëtë kësaj lëvizjeje, vetëm dy janë me kryetarin Kasami. Më herët u përfol se njëri prej grupimeve mund të bëhet pjesë e qeverisë, të cilës i duhen vota për të plotësuar kuorumin prej 61 votash për të qëndruar në pushtet, pas largimit të Aleancës për Shqiptarët të Ziadin Selës.
a.ç
