Nisma për Kosovën ka vendosur që në legjislaturën e dalë nga zgjedhjet e 11 qershorit, të ketë grupin e saj parlamentar.
Shefja e grupit parlamentar të Nismës, Valdete Bajrami në një prononcim për “kallxo.com” ka konfirmuar këtë. “Nisma për Kosovën në këtë legjislaturë do të ketë numër më të madh të deputetëve sesa në legjislaturën e kaluar dhe kjo tregon qartë se Nisma ka pasur rritje për 40%. Kryetari Limaj qysh gjatë fushatës zgjedhore ka deklaruar se deputetët e Nismës për Kosovën do të funksionojnë si grup parlamentar në vete”, u shpreh Bajrami.
Përmes një komunikate për media, Nisma ka njoftuar të shtunën se në këto zgjedhje ka arritur të marrë së paku 8 deputetë në Kuvend.
Ndërsa nënkryetari i Aleancës për Ardhmërinë e Kosovës, Ahmet Isufi tha se kjo nuk është çështje diskutimi ndërmjet partnerëve, duke shtuar se këto vendime do të merren pas çertifikimit të rezultateve.
“Momentalisht jemi duke pritur certifikimin e rezultateve dhe për ndryshimet tjera që mund të ndodhin në të ardhmen janë përfaqësuesit e partive politike të cilët bëjnë marrëveshje që mund të kenë një grup parlamentar, apo secila parti ndan të drejtën ta ketë grupin e vet parlamentar, por kjo nuk është temë e ditës tani”, tha Isufi.
Nënkryetari Isufi deklaroi se nuk e di nëse është zgjedhur deputet dhe shtoi se është duke pritur rezultatet e dala nga KQZ-ja.
Sipas rezultateve paraprake të KQZ, Koalicioni i tri partive që njihet ndryshe si PAN ka dalë e para duke marrë 33.92 për qind të votave. Veseli dhe Limaj kishin nominuar Haradinajn për Kryeministër. Por tashmë me largimin e Limajt nga koalicioni parazgjedhor, duket se rruga e Haradinajt drejt Kryeministrisë është e vështirë.
a.ç
