Për herë të parë ka nisur ofrimi i shërbimit të Koronarografisë në një prej spitaleve rajonalë të vendit. Është pikërisht ekipi i mjekëve të Spitalit Rajonal të Shkodrës, i mbështetur edhe nga mjekët kardiokirurgë të Qendrës Spitalore Universitare “Nënë Tereza” të Tiranës, që kanë realizuar gjatë kësaj fundjave kryerjen e dy procedurave të para të Koronarografisë në spitalin e kryeqendrës së veriut.
Tashmë, pacientëve të Shkodrës, por edhe gjithë zonës së Veriut, nuk do t’u duhet të udhëtojnë më drejt Tiranës për të pritur radhët e gjata por edhe për të marrë këtë shërbim, pasi ai mund të realizohet në Spitalin Rajonal të qytetit pas fillimit të punës së kabinetit të Kardiologjisë.
Një sukses ka qenë edhe kryerja e dy procedurave të para të koronarografisë të realizuara nga ekipi i mjekëve kardiokirurgë të Spitalit të Shkodrës dhe QSUT-së. Shefi i Shërbimit të Kardiokirurgjisë në QSUT, Prof. Dr. Edvin Prifti, theksoi se ky është eventi më i madh klinik në këtë qytet.
Për specialistët e fushës, hapja e këtij shërbimi në Shkodër do të thotë më shumë jetë të shpëtuara, pasi rastet urgjente me infarkt apo ato akute me problem në zemër trajtohen që në orët e para të shfaqjes së problematikës shëndetësore. Të gjithë pacientët, të sëmurët kardiake që janë aktualisht në qytetin e Shkodrës, kanë një mundësi të jashtëzakonshme për tu trajtuar pranë spitalit të qytetit, sidomos kjo në rastet akute dhe në rastet e infarkteve të cilët rrezikojnë jetën, janë shprehur ata.
Kurse për kardiologun e Spitalit të Shkodrës Luan Dragusha, ky shërbim do të ndikojnë në rritjen e jetëgjatësisë së pacientëve me probleme në zemër.
Pas një investimi total prej 75 milionë lekë në Repartin e Kardiologjisë në Spitalin Rajonal të Shkodrës, tashmë aty ofrohet një gamë më të gjerë shërbimesh ndaj pacientëve, cilësi të lartë, si dhe pajisje mjekësore diagnostifikuese dhe kuruese të teknologjisë më të përparuar.
Hapja dhe vënia në punë e kësaj salle është një tjetër premtim i mbajtur nga Qeveria shqiptare, duke ofruar kështu një shërbim shëndetësor të shpejtë dhe të specializuar për të gjithë banorët e zonës, ndërkohë që 5 milionë dollarë janë investimet e realizuara vetëm dy vitet e fundit në Spitalin Rajonal të Shkodrës, duke e shndërruar atë në një model të ri të shërbimit mjekësor, modern e bashkëkohor.
