“Për koalicionin kundër tepsisë”, Rama zbardh detajet e ‘sitës’ në administratë

Kryeministri Edi Rama ka folur edhe njëherë në lidhje me turin e planifikuar që pritet të nisë në të gjithë Shqipërinë kur do të bashkëbisedohet me shtresa të ndrysme mbi ato që duhen bërë më mirë në qeverisje.

Po ashtu, mendimet e qytetarëve janë të hapura edhe në faqen e kryeminsitrit dhe të deputetëve në qarqe, të cilat do të analizohen të gjitha. Sipas kryeministrit Rama, do të bëhet një analizë e gjerë e gjithë punës në hallkat e administratës dhe performanca apo sjellja e zyrtarëve dhe drejtuesve të institucioneve.

Ai thotë se mbi bazën e këtyre të dhënave, do të hartohet një raport që sipas tij do jetë “një nga dokumentat bazë që do t’i shërbejnë operacionit të çuarjes së tepsisë për skrap”

Postimi i Ramës:

PER KOALICIONIN KUNDËR TEPSISË

Të hënën do të mblidhemi me deputetët e rinj dhe kandidatët për deputetë, pra me të gjithë skuadrën tonë të 25 qershorit, për nisjen e turit të dëgjesave në bazë të çdo qarku gjatë gjithë muajit korrik.

Një aspekt i rëndësishëm i këtij turi dëgjesash, do të jetë mbledhja e të dhënave për punën e zyrave të administratës shtetërore. Për këtë qëllim do të përdoret edhe mbledhja e informacionit online nga njerëzit e zakonshëm, lidhur me zyrat e shërbimeve për publikun dhe punonjësit e drejtuesit e tyre. Në këtë fazë ky informacion do të mblidhet përmes kësaj faqeje, apo faqeve online të udhëheqësve tanë në çdo qark. Ndërsa më pas, kur Platforma e Bashkëqeverisjes me njerëzit, SHQIPËRIA QË DUAM, të jetë gati bashkë me Qeverinë e Re, një seksion i veçantë i saj do t’i shërbejë posaçërisht çdo qytetari; për të tërhequr vëmendjen e qeverisë për punën e zyrave të shtetit në çdo pikë të vendit apo vënë alarmin në qeveri, për raste konkrete të abuzimit me detyrën ose sjelljes së padenjë të nëpunësve të shtetit me njerëzit.