Ishte ora 00:20 e së martës, kur persona ende të paidentifikuar hapën zjarr në drejtim të një biznesi në rrugën “Skënderbej”, në Kamzë. Ndaj biznesit në fjalë, një agjenci funerale, u qëllua me një tek plumb me çifte, duke thyer vetëm derën e parë të xhamit.
Pronare e këtij biznesi është Emriana Muka, por a ishte ajo shënjestër e këtyre të shtënave? Gazetari i Klan News, Besar Bajraktaraj mëson se në fakt dyshimet janë që në shënjestër të jetë ish-bashkëshorti i gruas, i cili ka po ashtu një agjenci funerale, në anën tjetër të rrugës.
Vetë gruaja e pyetur në policia ka deklaruar se nuk ka konflikte dhe nuk dyshon te njeri. Çifti mësohet se ka rreth një vit e gjysmë i divorcuar. Ekzistojnë dyshime që autorët mund të kenë ngatërruar objektiv, për shkak se bizneset janë përballë njëri-tjetrit. Dyshimet mbështeten edhe në faktin se ish-bashkëshorti dyshohet të jetë në konflikte për shkak të borxheve.
/a.r
