Për herë të parë Shqipëria do të kthehet në “shtëpinë” e mbi 200 artistëve të rinj nga Mesdheu dhe Europa. Falë punës së Ministrisë së Kulturës dhe partnerëve të saj, në maj 2017 Tirana dhe Durrësi do të presin “Mediterranea 18”.
Në ambjentet e Ministrisë së Kulturës, në sallën “Tefta Tashko”, sot u mbajt konferenca për Bienalen e artistëve të rinj të Mesdheut dhe Europës, me prezencën e Ministres së Kulturës, Mirela Kumbaro, Presidentes së BJCEM, Dora Bei , Kryetarit të Bashkisë Tiranë Erion Veliaj, Presidentit të Rajonit të Pulias Michele Emiliano dhe drejtorit artistik të Bienales, Driant Zeneli.
Ministrja e Kulturës, Mirela Kumbaro në shpalljen e këtij eventi të rëndësishëm kulturor, i cili do të mbahet për herë të parë në vend vlerësoi bashkëpunimin me Rajonin e Pulias, Bashkinë e Tiranës dhe atë të Durrësit, si dhe mbështetjen institucionale të Ministrisë së Arsimit, Ministirsë së Punës dhe Çështjeve Sociale dhe partnerëve të tjerë. Kumbaro u ndal tek bashkëpunimet e shumta në fushën kulturore sidomos me Rajonin e Pulias ku falenderoi presidentin Michele Emiliano, për gatishmërinë e shprehur për të dhënë mbështetje dhe për të qenë krah Ministrisë së Kulturës në Bienalen “Mediterranea 18”.
“Jemi të lumtur pasi bashkë me Presidentin Emiliano kemi bërë shumë punë të mira dhe tek Presidenti Emilano kemi gjetur një mik dhe aleat për projektet e përbashkëta kulturore, dhe për të krijuar një hartë të përbashkët kulturore dhe turistike”, u shpreh Kumbaro. Më tej ministrja vlerësoi bashkëpunimin me Bashkinë e Tiranës dhe kryetarin Erion Veliaj, duke u shprehur se tashmë Tirana është shndërruar në një kryeqytet kulture.
Në konferencën për shtyp, Dora Bei presidentja e BJCEM u shpreh e lumtur dhe entuziaste që Bienalja vitin që vjen do të zhvillohet në Shqipëri. “Duhet të pranoj që Ministria e Kulturës dhe ju znj. Kumbaro e bëtë shumë të lehtë për ne, për këta artistë që vijnë nga 20 vende të ndryshmë dhe që do ta bëjnë Shqipërinë shtëpinë e tyre. Ne jemi shumë të entuziazmuar që Shqipëria është bërë antarja jonë më e re. Do doja të thoja që jemi shumë të lumtur për organizimin e Bienales në Maj në Shqipëri, sepse ne besojmë se përmes artit dhe kulturës, me të rinjtë, artistë e rinj me krijimet e tyre mund ta bëjnë më të mirë shoqërinë dhe nëpërmjet këtij procesi ne mundemi përmirësojmë kulturën tonë. Pas pak muajsh më shumë se 200 artistë nga 20 vende të ndryshme, do të vijnë këtu dhe do ta bëjnë Shqipërinë, jo vetëm Tiranën dhe Durrësin shtëpinë e tyre”.
Ndërsa Presidenti i Rajoni të Pulias, Michele Emiliano tha se pas bashkëpunimeve me Ministrinë e Kulturës tashmë e ndjen veten si në shtëpi: “Jam i lumtur se sa herë vij në Shqipëri, e veçanërisht në Tiranë kam ndjesinë se lëviz në një ambjent familjar. Kjo ndjesi familjare, që tha ministrja e Kulturës, e cila më ftoi me përzemërsi dhe thjeshtësi, kur ishim në Bari në një rast shumë të rëndësishëm gjatë Fiera del Levante , më shtyu të jem pjesë e organizimit të këtij eventi kaq të mrekullueshëm dhe të rëndësishëm në Shqipëri.”.
Nga ana e tij kryetari i Bashkisë, Erion Veliaj u shpreh i lumtur që Tirana tashmë ka një frymëmarrje tjetër sa i takon kulturës, duke renditur shfaqjet dhe ngjarjet e tjera kulturore që bëhen çdo javë në qytet. “ Dua t’ju përgëzoj për punën e bërë si Ministri Kulture, pasi tashmë njerëzit po stresohen sepse ka aq shfaqje në javë sa nuk dinë se kë të ndjekin më parë dhe unë them “të tilla strese paçim” . Ai theksoi rëndësinë e madhe të këtij eventi duke u uruar kurajo kuratorëve.
Në fund, Drejtuesi artistik i Bienales “Mediterranea 18”, Driant Zeneli prezantoi konceptin Bienales së artistëve të rinj të Mesdheut dhe Europës dhe kuratorët e saj. “Shtëpia’’ e Bienales së ardhshme ‘’Mediterranea 18’’ do të bazohet në 4 elementë: Historia, duke u nisur nga historitë personale, qofshin këto të ngulitura në kujtesë ose të harruara gjatë kohës. Konflikti, si gjendje njerëzore ndaj hapësirës fizike ku ne bashkëjetojmë. Ëndrra si projektim i shtëpisë, si e drejta themelore e njeriut për të qenë i lirë të zgjedhë dhe të dëshirojë shtëpinë e tij fizike apo imagjinare. Dështimi, elementi që qëndron mes përpjekjeve dhe pamundësisë duke u tjetërsuar gjatë rrugës në kërkim të shtëpisë së ëndrrave”, tha ai.
Ai zbuloi dhe kuratorët e Bienales të cilët janë: Jonida Turani, Maja Ciric, Maria Rosa Sossai , Eroll Bilibani, Ema Andrea dhe Tulla Center.
Funksioni i ‘’shtëpisë’’vendoset në diskutim, ndërsa zhvillimi i teknologjisë dhe rritja e ndërlikimit të strukturave politike, sociale dhe ekonomike kanë zbuluar kufijtë që për një farë kohe kanë qenë të padukshëm nga bota dhe sot risjellin diskutime lidhur me këto të fundit, por edhe për atë çka ‘‘shtëpia’’ është dhe si mund të bëhet. Kjo periudhë post-humanizmi kulturor e ka vendosur artin përball sfidës së re e të të ripërkufizuarit se çfarë vlere ka sot dhe ku gjendet “shtëpia jonë”, përse dhe si mund të kemi nevojë për të.
Në këtë rast, arti e sheh ‘’shtëpinë’’ si proces më shumë sesa si mesazh, i përbërë nga miliona pjesë, ku asgjë nuk humbet dhe as nuk gjendet, por i nënshtrohet një tjetërsimi të vazhdueshëm.
Bienalja e mesdheut shërben si një platformë ku artistët dalin jashtë rutinës së tyre dhe i bashkohen një dialogu ndërkulturor mes ‘’shtëpive’’- qoftë ato fizike, virtuale, shpirtërore apo imagjinare.
Mediterranea 18 e kthen shtëpinë në një ‘‘britmë’’ e cila zhytet në ujërat e Mesdheut dhe kërkon të sfidojë të kaluarën, të tashmen dhe të ardhmen. Për një herë të vetme, arti shkon përtej kritikës dhe provokimeve, nuk kërkon alternativa të reja, por riciklon për të ripërcaktuar ‘’shtëpinë’’ në gabimet gjatë procesit, në momentet e reflektimit përballë sfidave dhe kohës së pritjes për ri-ndërtim. /a.m.
