Partia Demokratike ka vijuar edhe sot akuzat ndaj Ministrit të Brendshëm Saimir Tahiri si i përfshirë në trafik droge. Nga selia blu në një dalje për mediat, Enkelejd Alibeaj u shpreh se me automjetin e makinës së Tahirit kryehet trafik droge dhe këtë e vërteton më së miri sistemi TIMS.
Ai tha se pavarësisht deklaratës publike të Tahirit se e ka shitur automjetin e tij tip Audi me targë “AA003GB”, në sistemin TIMS rezulton se vetë Tahiri e ka drejtuar atë kohët e fundit.
“Me 30 gusht të vitit 2014, një vit pasi ai deklaron se e paska shitur makinën, Saimir Tahiri shfaqet në timon në pikën kufitare të Kapshticës pikërisht me audin AA003GB. Ja ku është dokumenti i sistemit TIMS, e keni edhe në ekran. Më herët, me 16 gusht po të vitit 2014, Saimir Tahiri dhe e famshmja AA003GB, shfaqen në pikën kufitare të Qafë Botës. Dhe me 29 gusht të vitit 2014, sërish në Kapshticë, Saimir Tahiri me audin e tij AA003GB. Ja pra këto janë faktet. Saimir Tahiri nuk e ka shitur makinën. Ajo është prona e tij, dhe me të zhvillohet linja e trafikut të drogës, AA003GB. Kur makinën e tij private nuk e përdorin kushërinjtë e tij Habilaj, kontigjentë policie, të njohur si trafikantët më të mëdhenj të drogës në Vlorë, e përdor Ministri i Brendshëm. Ky mashtrim publik vërteton edhe një herë implikimin e drejtpërdrejtë të Saimir Tahirit në trafikun e drogës, madje komandimin e kësaj linje, pasi përdorimi i makinës së ministrit, është licencë, është imunitet, është garanci e paprekshmëri për bandën.” tha Alibeaj
Sipas tij, qoftë edhe fakti i pavërtetë i deklaruar publikisht nga Tahiri se automjetin e ka shitur por nuk e ka deklaruar do të thotë se ministri ka kryer informalitet për të cilin Prokuroria duhet të nisë hetimet.
“Edhe deklarata e tij se e ka shitur por nuk e ka deklaruar, që nuk është e vërtetë, është shkelje e ligjit. Si rregull qoftë edhe pas këtij deklarimi publik, Prokuroria duhet të kishte thirrur për marrjen në pyetje Tahirin. Në këtë rast ishte vetë Ministri që e deklaroi. Ja ku jemi, Ministri i Brendshëm i zhytur në krim.” përfundoi ai
