Sekretari për rendin dhe sigurinë në PD, Enkelejd Alibeaj, duke komentuar ngjarjet e fundit kriminale të ndodhura në Tiranë, ka bërë përgjegjës kryeministrin Rama dhe ministrin Tahiri, të cilët sipas tij nuk shqetësohen aspak për gjendjen e rendit dhe sigurisë.
“Një seri atentatesh dhe shpërthimesh me eksploziv kanë tronditur Tiranën, duke mbjellë terror e frikë dhe duke shtuar pasigurinë publike. Ky përkeqësim i rendit dhe i ligjit e ka kthyer kryeqytetin dhe vendin në ditën më të keqe të sundimit të bandave dhe kriminelëve. Atentatet me armë e me eksploziv në mes të Tiranës vijnë në kohën e klimës së miqësisë dhe partneritetit që ekziston mes qeverisë, mes Edi Ramës e Saimir Tahirit, me krimin”, ka deklaruar Alibeaj.
Sipas tij, “vetëm kjo e shpjegon lehtesinë me të cilën krimi hedh në erë me tritol dhe ekzekuton në zemër të Tiranës, në një serial që përsëritet çdo ditë”.
“Vetëm në 12 orët e fundit ka patur: një shpërthim tritoli te rruga “5 Maji” ndaj një biznesi, një atentat tek Komuna e Parisit ndaj një biznesmeni, një vrasje në zonën e ish-Bllokut. Ndërkohë që të dielën pati shpërthim me eksploziv tek rruga e Kavajës dhe pranë stadiumit “Qemal Stafa”. Valë e pahasur më parë e krimit, e rënies së rendit dhe sigurisë publike”, ka thënë Alibeaj.
Duke theksuar se qytetarët në Tiranë e mbarë vendin janë të tronditur, ai ka shtuar se, “i shqetësuar nuk është vetëm Edi Rama, i cili ka prioritet luftën brenda partisë, tenderat dhe konçesionet për miqtë”.
“I pashqetësuar nga kjo valë krimi është dhe Saimir Tahiri, i cili ka prioritet miqësinë dhe përfitimet prej krimit dhe jo qytetarët e rendin publik”, ka shtuar Alibeaj.
