Deputeti i PD Sherefedin Shehu, theksoi sot se “ministri Arben Ahmetaj pranoi dje se ka bërë dhjetra fluturime çarter, avionë të vënë ekskluzivisht në dispozicion për të. Ky është një rast i paprecedent ku një ministër shqiptar bën udhëtime të tilla të dyshimta, në fshehtësi, me luks marramendës. Ky abuzim i Ahmetajt është unik, i pahasur më parë as për krerët e shtetit dhe jo më për ministra”.
“Një fluturim çarter kushton të paktën 40 mijë euro dhe me shëtitjet e tij prej sheiku, Ahmetaj ka shpenzuar qindra mijë euro. Ky është një rast flagrant abuzimi dhe korrupsioni dhe Arben Ahmetaj e ka për detyrë të tregojë ku ka shkuar, për çfarë dhe kush ia ka paguar udhëtimet”, tha Shehu .
Deputeti i PD-së, Sherefedin Shehu, shtroi pyetjen: “Cili koncesion është dhënë, ose cila pasuri e vendit është falur pas këtyre fluturimeve çarter të Ahmetajt. A kanë lidhje këto çartera me landfillin e Elbasanit, me aferën Skavica apo me koncesionin e TVSH-së? Ky eshte model dhe korrupsion i përmasave të republikave të dështuara afrikane. Arben Ahmetaj është i zhytur në disa skandale, ndaj duhet të hetohet e të shkojë para drejtësisë dhe nuk duhet lejuar që të marrë një detyrë të re të rëndësishme si ajo e ministrit të Financave”, theksoi Shehu
