Pavarësisht se ditën e djeshme letra e policisë italiane shkruante e zezë në të bardhë se pajisja e ardhur në Shqipëri, ishte për qëllime trajnimi, zotërohej nga italianët dhe nuk kishte aftësi për të përgjuar… PD ka vijuar të deklarojë edhe këtë të premte se Ministrit Tahiri i doli gënjeshtra.
“Debati për përgjimin e paligjshëm jo vetëm nuk është mbyllur, por përkundrazi skandali është thelluar akoma më shumë.
Letra e ish drejtuesit të policisë italiane konfirmon, pohon drejtpërdrejt, se paisja ka hyrë në Shqipëri ilegalisht.
Sepse një paisje e tillë, gjurmimi e përgjimi, është ilegale kur futet pa u regjistruar në doganë, dhe është ilegale kur përdoret pa u vënë në dijeni dhe pa dhënë miratimin e tij Prokurori i Përgjithshëm.
Shihni kushtet e flagrancës ku janë kapur Tahiri e shefi i tij i policisë. Të dy thanë në fillim se një paisje e tillë nuk ekziston. Më vonë Tahiri e pranoi se pajisja ekziston.
Më pas Drejtori i Përgjitshëm i Policisë së Shtetit, Çako deklaroi në komisionin e sigurisë se pajisja nuk ekziston. Ndërkohë, ish drejtori i policisë italiane e hedh poshtë deklaratën e Cakos dhe thotë se pajisja ekziston, ka hyrë në Shqipëri dhe është përdorur.
Këto qëndrime kontradiktore, të mbushura me alibi e mashtrime, janë provë e krimit që kanë kryer Tahiri me vartësit e tij.”- deklaroi Ristani.
Ristani tha se prokuroria do duhet ti shkojë deri në fund hetimeve, por këto të fundit do të jenë të vështira, nëse Tahiri nuk largohet nga detyra.
“Por ky hetim që e pret mbarë vendi, pengohet çdo ditë nga qënia në detyrë e Tahirit dhe e Cakos dhe e rrjetit të tyre drejtues.
Ata duhet të largohen menjëherë nga detyra, që të kemi shpejt një drejtësi të plotë e objektive.”- tha sekretari i përgjithshëm i PD-së Ristani.
