Pas fyerjeve në distancë, duket se Partia Demokratike ka reaguar zyrtarisht dhe seriozisht në lidhje me gjobën e Bashkisë sa i përket dëmeve të shkaktuaranga protesta në Tiranë.
Në një deklaratë për mediat, këshilltari demokrat pranë Bashkisë, Fabian Topollaj, tha se Erion Veliaj ka kryer dy vepra penale. Sipas tij, Veliaj duhet të vihet nën akuzë për falsifikim dokumentesh dhe shpërdorim detyre.
“Tashmë në prokurorinë e Tiranës ka një kallëzim penal të kryer nga inspektori Karaj.
Ne i kërkojmë prokurorisë të hetojë me shpejtësi dhe të nxjerrë përgjegjësitë e Veliajt para ligjit.
Çdo qytetar i vendit do të ishte pas hekurave tani me këto dy vepra penale, të provuara tashmë publikisht” – tha Topollaj.
Sipas tij, Prokuroria ka rastin të tregojë se ligji funksionon për të gjithë, dhe se kreu i Bashkisë Tiranë nuk ka imunitet.
Dy ditë më parë, kreu demokrat Lulzim Basha tha se në vend të 163 milionë lekë gjobë do t’i jepte Veliajt një kastravec 163 mm tv gjatë. Ndërkohë, Edi Paloka tha se ‘Veliaj duhet të sjelli mamin te PD që të marri lekët e gjobës’.
