Partia Demokratike, me anë të juristit të saj në Komisionin Qendror të Zgjedhjeve, Ivi Kaso, ka pranuar se kontratat e konsulencës që kapin vlerën e 650 mijë dollarëve të përdorura me kompanitë amerikane janë të vërteta, por ato nuk janë shpenzime të fushatës zgjedhore të 25 qershorit.
Avokati i PD-së në KQZ theksoi dje se këto para janë paguar nga PD gjatë aktivitetit të saj të zakonshëm politik dhe si të tilla këto fonde do të deklarohen në raportin vjetor që PD do të depozitojë në KQZ në fund të vitit 2017.
Sipas tij, nuk ka asgjë për të fshehur dhe se kontratat i janë vënë KQZ-së dhe auditeve në dispozicion nga vetë PD-ja.
“Nuk ka asgjë të paligjshme dhe asgjë për t’u fshehur. Për sa u përket mospërputhjeve të tjera, ka kontrata konsulence që u janë vënë në dispozicion ekspertëve dhe monitoruesve të zgjedhjeve nga vetë PD-ja. Janë dhe pagesat që u janë vënë në dispozicion ekspertëve të KQZ-së nga vetë PD-ja, të cilat nuk figurojnë në raportin financiar të fushatës zgjedhore të PD-së dhe kjo për një arsye të thjeshtë, sepse janë kontrata që nuk kanë të bëjnë me fushatën zgjedhore të subjektit zgjedhor PD. Janë pagesa që nuk lidhen në asnjë mënyrë me pagesat zgjedhore të subjektit Partia Demokratike. Janë kontrata dhe marrëveshje të cilat lidhen me aktivitetin e zakonshëm politik të subjektit Partia Demokratike. Si të tilla, ato përfshihen në raportin e përgjithshëm vjetor të vitit 2017 të PD-së”, ka deklaruar dje avokati Ivi Kaso.
AKUZAT
Por, përfaqësuesi i PS-së në KQZ, Eridjan Salianji, ka kërkuar që kontratat e PD-së të hetohen nga Prokuroria pasi ato përbëjnë vepër penale dhe jo vetëm çështje administrative. Salianji tha se nuk dihet origjina e parave dhe ato mund të jenë para të ardhura nga droga apo krimi.
“Nuk mund të fshehësh diellin me shoshë. Është një vlerë shumë e madhe, flasim për 650 mijë dollarë nga partia kryesore e opozitës. Së pari pa deklaruar, së dyti nga kompani ku nuk u dihet origjina dhe prejardhja. Do të thotë që shkelja është mosdeklarimi, fshehja dhe për mua më e keqja është mosnjohja e subjekteve që kanë dhënë këto lekë. Se tek e fundit, në qoftë se do të ishte ndonjë firmë shqiptare apo ndonjë firmë e huaj dashamirëse e PD-së dhe mund ta pranonte sot faktin që s’kam dashur ta bëj publike dhe i kam dhënë këto fonde PD-së me këtë kusht dhe më pas do të diskutonim që kishim të bëjmë vetëm për mosdeklarim dhe do të ishte proces administrativ. Por, për mua ajo që është shkelje dhe e bën procesin penal është se nuk dimë nga kanë ardhur këto fonde. Mesa dimë, kompanitë që janë ligjore, që u dihet origjina e parave, i deklarojnë, vetëm kompanitë që kanë financime të jashtëligjshme, që i kanë nga droga, krimi, pastrimi i parave janë kompani që nuk deklarojnë as burimin dhe as personat që i bëjnë këto shpenzime. S’kemi të bëjmë me dhurim apo financim nga një kompani”, ka thënë Salianji.
Por juristi i PD-së ka kërkuar nga partitë politike që të bëjnë durim dhe të presin hetimin e Prokurorisë, të cilin sipas tij e kërkoi vetëPD-ja.
“Nëse shqetësimet tuaja janë të natyre penale për shkelje penale që tejkalojnë kompetencën tuaj, kini besim që organi i ngarkuar nga ligji dhe Kushtetuta si organi i vetëm mund të çojë përpara ndjekjen penale në Republikën e Shqipërisë. Lëreni të bëjë detyrën dhe prisni me qetësi konkluzionet e hetimit”, tha dje Kaso./Fation Binjaku
