Vendi po shkon drejt një krize të mundshme parlamentare, të paktën kështu mendojnë demokratët, të cilët janë të vendosur të përshkallëzojnë qëndrimin e tyre deri në dorëzimin e mandateve nëqoftëse nuk plotësohen 3 kërkesat kusht. Në një intervistë për Ora News, kryetari i grupit parlamentar demokat Edi Paloka, tha se kryeministri Edi Rama nuk heq dorë nga promovimi i krimit, ndërsa e akuzoi atë se ka zhytur vendin në krizë e cila, siç thotë ai, mund të zgjidhet vetëm me largimin e tij.
Partia Demorkatike mund të përshkallëzojë qëndrimin e saj në raport me Kuvendin deri në lënien e mandateve, nëqoftëse mazhoranca nuk pranon kërkesat e saj, të cilat një ditë më parë u futen në procedurë parlamentare.
Kryetari i grupit parlamentar demokrat Edi Paloka, tha se kërkesat e Partisë Demorkatike janë të domosdoshme në kushtet ku, siç tha ai, Kryeministri mbron kriminelët brenda dhe jashtë parlamentit.
Paloka: Sigurisht është një akt ekstrem dorëzimi i mandateve por aspak i pamenduar dhe nëse Rama do kërkojë ta çojë vendin drejt një situate të pakontrolluar, atëherë dorëzimi i mandateve do të jetë vetëm hapi i parë. Pastaj është përmbysja me çdo mënyrë e këtij regjimi, nuk mbetet gjë tjetër.
Por apo shkon vendi drejt një krize të thellë parlamentare, kur mazhoranca dhe vetë kryeministri Rama e kanë rrëzuar mundësinë për të pranuar amendamentin e demokratëve për ligjin e dekriminalizimit që synon të pezullojë çdo zyrtar që arrestohet në flagrancë?
Paloka: Nuk bëhet fjalë për vullnetin e Ramës, bëhet fjalë për të realizuar diçka që është domosdoshmëri për Shqipërinë. Nëse ai do të qëndrojë në pozicionin e tij, sigurisht ne do të marrim pozicionet tona. Kriza ka filluar që kur Rama ka ardhur në pushtet dhe është krizë jo thjesht politike, por ekonomike, shoqërore.
Ndryshe nga qëndrimi i këtyre ditëve, demokratët gjatë javës së ardhshme do të marrin pjesë në disa Komisione parlamentare, kryesisht në ato që do të diskutohen nismat e tyre.
Demokratët kërkuan ndryshimin e ligjit të dekriminalizimit që lidhet me ndërprerjen e mandatit të zyrtarit nëqoftëse ai arrestohet në flagrancë për një krim kundër jetës, ndryshimin në ligjin për Komisionet hetimore që synon pamundësinë e bllokimit të tyre dhe dërgimin në gjykatën Kushtetuese të deputetëve, të cilët akuzohen për shkelje të Kushtetutës. Oranews
