Kriza politike brenda selisë blu pritet të kthehet edhe në një vështirësi financiare. Kodi Zgjedhor parashikon se partitë marrin mbështetje financiare për fushatën elektorale, por në rastin e PD-së, kjo mbështetje nuk do të ekzistojë për zgjedhjet e 14 majit, për shkak të bojkotit të demokratëve në procesin e vitit 2019.
Fondet përllogariten në bazë të rezultatit të zgjedhjeve të fundit vendore, në të cilat PD-ja bojkotoi dhe tanimë vuan pasojën e radhës, atë të mosmbështetjes buxhetore. Kësisoj, paratë do të shkojnë direkt në arkën e Partisë Socialiste si forca politike e cila i fitoi të gjithë pushtetin vendor.
“Partitë politike pjesëmarrëse në zgjedhje dhe që kanë marrë jo më pak se 1 për qind të votave në shkallë vendi në zgjedhjet më të afërta pararendëse të të njëjtit lloj, përfitojnë fonde nga Buxheti i Shtetit, në bazë të numrit të votave që secila parti ka marrë në ato zgjedhje”, thuhet ne Kodin Zgjedhor
Krahas parave për fushatë elektorale, partitë politike marrin edhe një mbështetje financiare të përvitshme për funksionimin e tyre. Fondet për vitin 2023 pritet të përkthehet në një krizë të dyfishtë brenda PD-së, të ndarë në dy grupime që pretendojnë se kanë drejtimin e partisë.
