Kryebashkiaku në ikje i Kavajës, Isa Sakja, nuk ndan të njëjtin mendim me Jozefina Topallin se PD ka prekur fundin me zgjedhjet e sotme.
Në një reagim të gjatë në facebook, Sakja ka reaguar ashpër ndaj ish-funksionares së lartë të PD-së, duke e akuzuar se që kur dy vjen më parë humbi pushtetin brenda PD-së ajo bëri pak me djallin kundër kësaj partie.
Sakja thotë se Topalli flet me të njëjtën gjuhë si Edi Rama, artikulon të njëjtat teza si Edi Rama, madje edhe “keqardhjen” për PD-në e shprehin njësoj.
“Prej kohësh, nuk habitem më me mllefin e zonjës Topalli kundër Partisë Demokratike, kryetarit të saj Lulzim Basha dhe, së fundmi, edhe kundër liderit historik Sali Berisha” thotë Sakja.
Sakja i bën me dije Topallit se ka kapur fundin si qënie politike.
“Nuk po zgjatem as me moralizmat e tua miope për ndërkombëtarët, sepse nuk dua të kujtoj që u bëre barsaleta e pushtetit të PD, kur nxirrje jashtë nga zyra ambasadorët e SHBA-së dhe të OSBE-së” përfundon Sakja.
