Avokati Spartak Ngjela ishte i ftuar këtë të hënë në “Studio Live” me Arbër Hitajn në Report Tv, për të diskutuar mbi zhvillimet më të fundit politike, brenda dhe jashtë vendit.
Duke nisur nga procesi i primareve në Partinë Demokratike, Ngjela tha se pavarësisht se në parim është një hap pozitiv, në thelb ngelet farsë.
Sipas tij, primaret nuk do të kenë ndikim në formimin e listave me kandidatët për deputetë në zgjedhjet e 11 majit, qëllim për të cilin është pretenduar se po bëhet ky proces.
“Si koncept ishte zhvillim. Por fakti që paskan dalë kundër Saliut u tregua që “ku shkove, atje ku ishe”. Ai ktheu prap dhunën në politikën e brendshme të PD-së. Nuk i interesojnë këta që erdhën, seç kërkon të nxjerrë, nuk kupton gjë fare. Ende nuk dimë do dënohet apo jo. Ka një barrë thesë në krah dhe merret me bretkosa, të shikojmë gjyqin”,- tha Ngjela.
Për avokatin, Partia Socialiste nuk do ketë aspak kosto elektorale nga arrestimi i kryebashkiakut të Tiranës, Erion Veliajt.
“Si bën gjë fare, ajo parti nuk i nxjerr votat nga individët, janë votat e partisë ato. Dhe kanë filluar që në vitin 46’-47’. Nuk kanë nevojë farë për emra. PS dhe pastaj seç nxjerr PS, ata kanë adhurues”,- u shpreh ai.
“Nuk kanë kundërshtarë. Kundërshtarët janë në batak. Nuk kanë fjalë jo më fjali, as program, as sistem mendor, as ide”,- theksoi Ngjela.
Avokat Ngjela foli edhe për luftën në Ukrainë dhe zhvillimet më të fundit ndërkombëtare të prodhuara nga ky konflikt. Ai analizoi krisjet mes SHBA dhe BE, të ndodhura pas rikthimit të republikanit Donald Trump në Shtëpinë e Bardhë.
‘Gjithë problemi i BE është që duke përfituar nga mbrojtja që i jepte, SHBA, e cila e kishte dosmosdoshmëri mbrojtjen e Perëndimit… Mirëpo ky ndërroi politikë dhe BE ka dalë zbuluar, jo se s’ka para, por nuk ka shpenzuar për mbrojtjen”,- tha Ngjela.
“Do t’i ngrenë ushtritë në nivelet e larta të krijimit të zonës së tyre të sigurisë? Kam përshtypjen që po, para kanë para sa të duash, teknologji kanë në nivele të larta. Por u interesonte që jemi nën ombrellën e NATOs, kontributet e tyre në NATO ishin shumë të vogla në krahasim me të Amerkës”,- shtoi ai.
Ngjela komentoi edhe përplasjen mes presidentit Volodymyr Zelenskyt dhe Trumpit në Zyrën Ovale.
“Njëri mbronte atdheun, tjetri mbronte pushtuesin. Jashtë moralit më di mua ti. Zelensky mbrojti atdheun. Politika perëndimore është e mendimit që të vazhdojë lufta që të rrënohet Rusia. Të dhënat e mia janë që po e ndihmon underground, në mënyrë të fshehtë, e di dhe Rusia”,- deklaroi ai.
Kundër mendimit të përgjithshëm të opinionit publik në Shqipëri dhe mbarë botën, kreu i PD-së, Sali Berisha, tha përplasja në Zyrën Ovale mes Trump dhe Zelenskyt, ishte për faj të këtij të fundit.
Ngjela e cilësoi këtë si një tentativë të dëshpëruar të Berishës për të fituar aleatë në Uashington.
“Kush e pyet atë, ai s’ka pushtet, ai kërkon aleatë që të vijë në pushtet, shumë e thejshtë, ku ka votë ai. Ata që do ta besojnë, do bien brenda. Nuk fiton dot. Është pamundësi absolute”,- tha Ngjela.
“Është në dekancë, nuk dihet do të ndënohet apo jo. Po u dënua del nga politika”,- theksoi ai.
