Listës me emra gjyqtarësh e prokurorësh që këtë të premte Ministri Tahiri i dorëzoi Presidentit, i mungojnë emrat e gjyqtarëve apo prokurorëve,që bënë të mundur që të liroheshin “rilindasit” Arben Frroku apo Armando Prenga. Kështu tha deputeti demokrat Gent Strazimiri i cili shtoi se Ministri i Brendshëm nuk është autoriteti që kontrollon sistemin gjyqësor.
“Qeveria, nëpërmjet ministrit të Brendshëm, ka përpiluar dhe bërë publike një listë gjyqtarësh e prokurorësh që paskan bërë “çudira” në proceset penale duke liruar të pandehur në mënyrë të padrejtë. Këtë listë ia ka bërë me dije Presidentit të Republikës në cilësinë e Kryetarit të Këshillit të Lartë të Drejtësisë, duke tërhequr vërejtjen për mosmarrje masash. Edhe sikur në këtë vend qeveria apo Ministri i Brendshem të ishte autoriteti shtetëror që mbikqyr gjykatat dhe Prokurorinë në dhënien e drejtësisë, edhe sikur kjo të mos përbente një skandal kushtetues, ligjor e moral, lista e çështjeve dhe individëve që shqetësojnë qeverinë nuk është aspak ajo që tmerron opinionin publik dhe qytetarët e këtij vendi. Në listën në fjalë, nuk përmenden prokurorët, gjyqtarët dhe oficerët e policisë gjyqësore që çmontuan procesin ndaj deputetit të radhes në listën e “Rilindjes”, Arben Frroku; as gjyqtarët e “lartë”, prokurorët e oficerët e policisë gjyqësore që “bënë mrekullinë” dhe liruan deputetin tjetër “rilindas” Armando Prenga, ndërkohë që mbajnë në burg viktimat e tij me plumbat ende në trup”- tha Strazimiri.
Këtë të premte, Ministri Tahiri i dërgoi një letër Presidentit Nishani, me të gjithë emrat e funskionarëve në gjykata që kanë liruar persona me precedentë penalë nga burgu.
