Partia Demokratike kërkon në Këshillin e Bashkiak të Tiranës që të shtyhet vendimmarrja për ndarjen e banesave sociale në zonën e Shkozës dhe dhënien e ndihmës ekonomike për Bashkinë e Tetovës. Kryetari i Këshillit të PD, Leonard Olli, tha se nga rendi i ditës duhet të hiqen për miratim disa projektvendime duke fajësuar për këtë mungesën e stafit të Bashkisë së Tiranës në komisionet përkatëse. Për këtë çështje, përfaqësues të mazhorancës bënë të ditur se përfaqësues të bashkisë kanë qenë në këto komisione.
Pikat të cilat kërkohej nga Partia Demokratike shtyrja janë projektvendimi për “Disa ndryshime në nivelin e pagave të punonjësve të Njësive Administrative të Tiranës”, projektvendimi për ‘’Përzgjedhjen e listës së aplikuesve, përfitues të programit të banesave sociale me qera, në zonën e Shkozës, ish-fonderia mekanike”.
Në përfundim të diskutimit për këtë çështje, përfaqësuesit e mazhorancës në Këshilli Bashkiak me shumicë votash vendosën përfshirjen e këtyre çështjeve në rendin e ditës.
***
Këshilli Bashkiak i Tiranës, i dalë nga zgjedhjet e qershorit të këtij viti, ka nisur sot mbledhjen e tij të parë ndërkohë që edhe këshilltarët e së djathtës që braktisën mbledhjen e betimit të kryetarit, kanë qenë të pranishëm sot.
Mbledhja e hapur nga kreu i Këshillit, Aldrin Dalipi, ka në rendin e ditës shpërndarjen e ndihmës sociale për mbi 4600 familje. I pranishëm është edhe kreu i ri i bashkisë, Erion Veliaj, ndërkohë që familjet që përfitojnë nga ndarja ekonomike bëjnë banorë në 24 njësite e reja administrative.
Në mbledhjen e sotme është bërë edhe zëvendësimi i dy këshilltareve Albrahimi dhe Paskali që dhanë dorëheqjen.
Ndërkohë, kreu i bashkisë Veliaj ka bërë të ditur se nuk do të ketë ndryshim të paketave fiskale për njësitë e reja të krijuara. Ai ka kërkuar të vendoset bashkëpunimi i munguar mes palëve ndërsa tha se reformat nuk duhet të kenë pasoja negative.
