Mbretëresha e Danimarkës nderoi dje arkitektin e Teatrit të Ri me titullin Kalorës i Kryqit për merita në shërbim civil e kontribute në art dhe shkencë. Përkundër sulmeve të opozitës këtu në Shqipërisë e cila e shpalli edhe non-grata, arkitekti danez, Bjarke Ingels, që ka projektuar disa prej ndërtesave më të bukura në botë, është një nga më të vlerësuarit. “Për të kuptuar sa pa sens është “haxhi-qamilizmi” i disave me “persona non-grata” e histeri pa mend, Mbretëresha e Danimarkës sapo nderoi arkitektin e @TeatriRi me titullin Kalorës i Kryqit për merita në shërbim civil e kontribute në art & shkencë”, shkruan Veliaj.
Medalja është miratuar personalisht nga Mbretëresha e Danimarkës dhe i jepet një personi ose një grupi njerëzish që kanë pasur ndikim të rëndësishëm në avancimin e arkitekturës.
Arkitekti danez, Bjarke Ingels, është projektuesi i Teatrit Kombëtar në kryeqytet. Themelues dhe partner i “Bjarke Ingels Grou”p (BIG), 43-vjeçari vlerësohet për konceptet sociale në arkitekturën e tij. Studio e Bjarke Ingels numëron një staf prej 400 personash.
Ai ka ndërtuar një sërë objektesh, që i kanë dhënë emër në botë. Bjarke Ingels ka projektuar “Two World Trade Center” në Nju Jork, ndërsa në vitin 2017 ai dhe kompania e tij ishte në qendër të një dokumentari të quajtur “Big Time”. Midis punëve të tij të shumta është dhe kompleksi i ri i zyrave të “Google”, apo “Eurocity” në Francë. Një ndër veprat më të bukura pritet që të jetë edhe ndërtimi i stadiumit të Barcelonës, dizenjimi i të cilit është besuar pikërisht Bjarke Ingels Group.
Në vitin 2011, gazeta e madhe ekonomike amerikane “Wall Street Journal” e vlerësoi Ingelsin si “Inovatori i Vitit” për arkitekturën, ndërkohë që “Time Magazine” në vitin 2016 e përfshiu atë në “100 njerëzit më me influencë”. Bjarke Ingels ka marrë 21 çmime ndërkombëtare të ndryshme./a.ç
