PD dhe LSI reaguan sot pas dhunës së ushtruar ndaj gazetarit sportiv Eduard Ilnica.
Kryetari i Komisionit të Medias, deputeti i PD-së, Genc Pollo tha se kjo cënon lirinë e shtypit duke e hedhur përgjegjësinë dhe fajin nga institucionet ligjzbatuese .
“Edhe një gazetar tjetër i dhunuar barbarisht pasi bëri detyrën, raportoi për dhunën në stadium. Në mes të Tiranës! Asnjë dënim apo solidarizim nga qeveria, ministri i Brendshëm, i Sportit. Si dhe më parë. Liria e shtypit poshtë”, deklaroi Pollo.
Deputeti i Lëvizjes Socialiste për Integrim i Qarkut Dibër, Përparim Spahiu tha se plagët në trupin e Ilnicës janë plagë të marra në trupin e sportit dhe gazetarisë sportive në vend.
“Plagët në trupin e Eduard Ilnicës janë plagë të marra në trupin e sportit dhe gazetarisë sportive në vend. Dy urime për shërim sa më të shpejtë: gazetarit të zellshëm dhe futbollit, sportit tonë të dashur”, deklaroi Spahiu./a.m.
