Partia Demokratike ka reaguar ndaj deklaratave të Ministrit të Mirëqënies Sociale dhe njëherësh kandidatit të mazhorancës për bashkinë e Tiranës Erjon Veliaj.
Përmes një komunikate zyrtare, PD e ka cilësuar të turpshme deklaratat e Veliaj sipas të cilit numri më i madh i azilkërkuesve është nga komunat e djathta.
“E turpshme si një anëtar i këtij kabineti që u kujdes dy vjet për mirëqenien personale e ndan Shqipërinë në tonën dhe të tyre. Njerëzit po ikin se qeveritarë dhe zotëria në fjalë kujdesen vetëm për mirëqenien e tyre. Qytetarët i kanë zhytur në mjerim, papunësia është rritur, çmimet po ashtu. Këta kredhen nëpër ekrane me suksese imagjinare. Shqiptarët po marrin rrugët e botës ndërsa këta janë strukur në luksin e siguruar nga lekët e shqiptarëve.” thuhet në komunikatën e PD
Ministri Veliaj ka njoftuar sot gjatë nënshkrimit të marrëveshjes për njohjen e pensioneve me Kanadanë, se do të dorëzojë mandatin e ministrit të mërkurën.
Redaksia Online
(Javanews.al)
