Opozita kërkon heqjen e mandatit të deputetit socialist Vullnet Sinaj, duke e akuzuar se përmes bizneseve të tij ka përfituar 36 mijë euro nga buxheti i shtetit.
PD dhe Partia e Lirisë i janë drejtuar sot (5 mars) Gjykatës Kushtetuese me kërkesën që të bëjë deklarimin si të papajtueshëm të vendimit të 30 Janarit 2025 në Parlament, për mosdërgimin e mocionit në Gjykatën Kushtetuese nga Kuvendi për mandatin e deputetit socialist Vullnet Sinaj.
PD e cilëson si të papajtueshëm mandatin e ligjvënësit socialist dhe për këtë shkak i është drejtuar me firmat e 14 deputetëve, mes tyre edhe Erisa Xhixho, përfaqësuese e Partisë së Lirisë, që Gjykata Kushtetuese të detyrojë Kuvendin e Shqipërisë për dërgimin në këtë institucion të “mocionit të konstatimit të papajtueshmërisë së mandatit të deputetit Vullnet Sinaj”.
Kërkesa është hartuar dhe dërguar ditën e sotme (5 mars) dhe Gjykata Kushtetuese konfirmon regjistrimin e saj.
Deputetët opozitarë mes të tjerash kërkojnë “zgjidhjen e konfliktit të kompetencave mes Kuvendit të Shqipërisë dhe subjektit kushtetues në konflikt, jo më pak se 1/10 e deputetëve”.
Kujtojmë se Kuvendi është në fund të mandatit të tij 2021-2024 dhe deputetët në mbarim të tij, teksa pas pak javësh nis edhe fushata elektorale për zgjedhjet parlamentare të 11 Majit.
Lista e 14 deputetëve nënshkrues të kërkesës:
-Gazment Bardhi
-Flamur Noka
-Elda Hoti
-Leftter Gështenja
-Edi Paloka
-Sorina Koti
-Erisa Xhixho
-Qani Xhafa
-Petrit Doda
-Eralda Bano
-Dhurata Çupi
-Kasëm Mahmutaj
-Saimir Koreshi
-Ina Zhupa
