Opozita do të mbajë një qëndrim të kufizuar në Parlament, teksa nuk përjashtohet mundësia që ajo të vijojë me skenarin e bllokimit të foltores së parlamentit deri në krijimin e një konflikti të tensionuar me maxhorancën. Pavarësisht mesazheve të komisionerit Hahn për të mos kushtëzuar reformën, opozita do të bllokojë seancën e kësaj të enjteje.
Kushti kryesor që mban PD-në në pozicion sulmues dhe konfliktual kur vjen puna për të mbajtur një qëndrim normal në parlament është mandati i dy deputetëve të PS-së, Rakip Sulit dhe Valentina Leskajt. Prej kohësh tashmë, opozita akuzon dy deputetët në fjalë për marjen e parave dhe fondeve publike.
Burime të Javanews brenda selisë blu, bëjnë të ditur se në mbledhjen e djeshme të PD-së është vendosur që qëndrimi në parlament të jetë i kufizuar, duke lënë të hapur mundësinë deri në bllokimin e plotë të seancës plenare.
Një kusht ky, që demokratët e kanë vënë përpara vetes dhe bashkëpunimit të tyre me maxhorancën, në normalizimin e procesit të reformës në drejtësi.
Në rendin e ditës në Parlament nuk parashikohet asnjë diskutim që ka të bëjë me mandatet e deputetëve socialistë, madje as në kalendarin 3 javor të punimeve të kuvendit, nuk përfshihet asnjë pikë për çështjen në fjalë.
Debati do të nisë qysh herët, teksa pritet që mes palëve situata të tensionohet fillimisht në mbledhjen e Konferencës së Kryetarëve, kur opozita të kërkojë sërish që në rendin e ditës të qëndrojë dërgimi i mandateve të Sulit dhe Leskajt në Gjykatën Kushtetuese, ashtu siç ndodhi me mandatin e Kokëdhimës.
Në mbledhjen me dyer të mbyllura të ditës së djeshme në PD, u diskutua gjithashtu edhe për dekriminalizimin, teksa Basha u ka kërkuar deputetëve që të nisin të plotësojnë sa më parë formularin e vetëdeklarimit.
