Astrit Patozi, dikur figura nr 2 e Partisë Demokratike mendon se ky subjekt politik po bën një gabim të rëndë me vendimin për të mos t’u futur në zgjedhjet vendore të 30 qershorit. Ai i ka bërë thirrje kryetarit aktual të demokratëve, Lulzim Basha që të reflektojë, pasi i është futur një aventure dhe ka lënë në baltë shqiptarët, duke mos u ofruar atyre alternativë në zgjedhje. Si koordionator i Bindjes Demokratike, praktikisht kryetar i saj, ai thotë se partia e tij ka për detyrë që t’u ofrojë shqiptarëve alternativë në këto zgjedhje vendore. Patozi ishte i ftuar në emisionin Kapital në VIZION+.
Intervista
Gazetari: Mirëmbrëma, mirë se vini në Kapital! Në zgjedhjet e 30 Qershorit, zgjedhjet për pushtetin lokal ka hyrë tashmë në garë edhe partia më e re e formuar në spektrin politik të Shqipërisë, BINDJA DEMOKRATIKE. BINDJA do të konkurojë me 27 kandidatë për kryetarë bashkish dhe me lista bashkiake në rreth 50 bashki. Një fillim i ri, një fillim i vrullshëm që ndoshta mund të quhet edhe një surprizë dhe që në fakt është një telash për PD të Lulzim Bashës i cili nuk e ka fshehur në fakt armiqësinë për këtë aksion të vrullshëm politik të Astrit Patozit, i cili do të jetë i ftuari im sot në Kapital. Z. Patozi mirëmbrëma mirë se vini në Kapital.
Astrit Patozi: Mirë se ju gjeta.
Gazetari: unë thashë që është një fillim i vrullshëm i Partisë BINDJA DEMOKRATIKE, kordinatori i të cilës ju jeni, praktikisht numri 1 i partisë. 27 kandidatë për kryetar bashkie, 50 lista për këshillat bashkiakë. Për disa është një fillim i vrullshëm, për disa të tjerë është një aventurë. Po për Astrit Patozin në fakt çfarë është?
Astrit Patozi: Është finalizimi i një përpjekjeje të gjatë, gati 2 vjeçare të një grupi njerëzish që mendojnë se Shqipëria ka nevojë për një projekt të ri politik, që Shqipëria ka nevojë për një riformatim të sistemit të saj politik i cili sipas nesh është i kalbur, është në grahmat e fundit dhe koha po e provon. Kriza politike sot në Shqipëri, gjendja jashtë e një pjese të opozitës dhe qeveria në istikamin e saj nuk janë gjë tjetër veçse shenjat që ky sistem duhet rrëzuar dhe BINDJA DEMOKRATIKE garon në këto zgjedhje për të shpalosur programin e saj dhe vizionin e saj për Shqipërinë. Por nuk është ky basti jonë, pra ne nuk hyjmë në këto zgjedhje për të fituar por hyjmë në këto zgjedhje për të marrë pjesë, për të bërë diferencën me pjesën tjetër dhe për t´u përballur me qeverinë.
Gazetari: Që do të thotë që gara juaj ndoshta edhe më serioze edhe më sfiduese do të jetë ajo e zgjedhjeve të përgjithshme që janë të parashikuara në vitin 2021.
Astrit Patozi: Pa dyshim.
Gazetari: Z. Patozi ju thoni që ky sistem është në grahmat e fundit por shumëkush mund t´ju kujtojë që ju keni qenë pjesë e sistemit, keni qenë numri 2 i PD, figura e dytë pas Sali Berishës. Pra dikush mund t´ju thotë tani u kujtuat ju që ky sistem është i kalbur?
Astrit Patozi: Jo, unë nuk jam kujtuar tani meqë po më drejtoheni në numrin njëjës. Se unë do të doja të flisja për ne, pra për BINDJEN DEMOKRATIKE si një bashkim vullnetesh. Por unë nuk jam kujtuar tani. Unë kam të paktën 6 vite apo më shumë që flas për këtë çështje brenda partisë time por edhe jashtë, pra edhe në publik. Por nuk është problem me mua, unë nuk mund të bëja njëkohësisht edhe opozitën edhe pushtetin kur kisha detyra të rëndësishme në PD, se ne e kishim një opozitë dhe opozitën e kemi pasur luftarake, të fortë, opozita e Edi Ramës në mandatin tonë 2005 – 2013. Kam folur, por edhe sikur të mos kisha folur, edhe sikur sot të kujtohesha për herë të parë, prapëseprapë do isha në të drejtën time. Pse? Çdo politikan dhe çdo njeri ka të drejtën e tij të reflektojë dhe unë them që kam reflektuar shumë herët. Por gjithëkush është në të drejtën e tij të reflektojë edhe tani. Unë do të doja që sot përshembull të reflektonte edhe Lulzim Basha, ish vëllai im i hershëm politik, i cili sot është në një aventurë do thoja të pashpresë.
Gazetari: Ai sot është kryetari i partisë ku ju deri dje ishit numri 2 dhe për këtë parti, për Lulzim Bashën BINDJA DEMOKRATIKE, Astrit Patozi sot për ata nuk është tjetër veçse një fasadë, një patericë e qeverisë për të fshehur mungesën, sipas tyre, e opozitës së vërtetë.
Astrit Patozi: Tani unë nuk e ndaloj dot as Lulzim Bashën dhe as këdo tjetër që të ketë një opinion për BINDJEN DEMOKRATIKE. Janë të lirë që të jenë skeptikë, të jenë mospranues, të jenë refuzues dhe kjo është e drejtë e tyre. Por unë kam një gjë për këdo që sot paragjykon BINDJEN DEMOKRATIKE, unë i them që na lejoni të gabojmë. Pra ne sot kemi vetëm projektin, nuk kemi asnjë aksion politik dhe aksioni jonë i parë politik do të jenë zgjedhjet e 30 Qershorit. Në rast se ne vërtet tregohemi që jemi në krah apo në ndihmë të Edi Ramës dhe rilindjes, shqiptarët do e ndiejnë nuk ka nevojë t´ja tregojë dikush tjetër. Por unë vetëm mund të them një gjë sot. Që në rast se ne konsiderohemi që po ndihmojmë qeverinë sot, unë them që nuk ka ndihmë më të madhe për qeverinë sesa të ikësh nga zgjedhjet dhe t´i lësh mbështetësit e tu dhe shqiptarët në përgjithësi pa asnjë alternativë. Se në rast se nuk do të ishte BINDJA DEMOKRATIKE sot do të kishim 61 bashki të fituara nga PS në tavolinë. Dhe këtë mund t´a bëjë vetëm një force politike e papërgjegjshme sipas nesh. Pra, në rast se ne nuk do ekzistonim, ne që garojmë në 27 bashki, zgjedhja e kryetarëve të bashkisë do ishte si emërim drejtorësh. Kjo gjë është papërgjegjshmëri dhe e papranueshme për ne.
Gazetari: Ky skenar vërtetohet menjëherë në rast se zhvillohen zgjedhjet siç janë dekretuar. Por për PD, për Lulzim Bashën nuk do të ketë zgjedhje. Mendoni ju se nuk do të ketë zgjedhje?
Astrit Patozi: Jo, unë mendoj që zgjedhje do të ketë sepse zgjedhjet i ka dekretuar Presidenti i Republikës dhe në zgjedhje merr pjesë populli. Pra, populli është i ftuar që të zgjedhë. Unë nuk besoj se ka ndonjë forcë që ta ndalojë popullin për t´u shprehur. Ata mendojnë që ka, janë të lirë që ta besojnë ëndrrën e tyre por ne mendojmë që është e pamundur që të ndalohet populli të shprehë vullnetin e tij. Por në rast se do të ndodhë që zgjedhjet do të pengohen, atëherë le të bjerë qeveria. Do të thotë që qeveria është e paaftë për të zhvilluar zgjedhjet, një nga funksionet e veta bazike. Sepse i bie që në rast se zgjedhjet nuk mbahen ose rrëzohen, bie edhe qeveria.
Gazetari: Ky do të ishte sukses i Partisë Demokratike. Por rrëzimi i qeverisë mund të ishte një kosto në kuptimin e konfliktit social.
Astrit Patozi: Sigurisht që ne do ja njohim. Në rast se kjo do të ndodhë ne do ja njohim si sukses Partisë Demokratike dhe unë e deklaroj që tani. Por unë nuk e besoj këtë skenar.
Gazetari: Pra ju do ta quanit si sukses të PD në rast se ata rrëzojnë qeverinë duke bllokuar në mënyrë të dhunshme zhvillimin e zgjedhjeve.
Astrit Patozi: Unë nuk e besoj këtë gjë dhe nuk do e dëshiroja kurrë që të kërkoja të rrëzohej me dhunë një qeveri. Sepse me dhunë i bie që do ta rrëzojnë. Unë jam kundër revolucionit, kam qenë që ditën e parë në vitin 1990 e deri sot që po flasim kundër revolucionit. Për të mos thënë në herët në biografinë e familjes time. Ata që besojnë te revolucioni janë të lirë ta bëjnë edhe ta provojnë, por unë nuk besoj që kjo funksionon.
Gazetari: Z. Patozi, u mor për njëfarë kohe, për disa ditë në mënyrë intensive me partinë tuaj në kohën që ju po regjistroheshit (si parti) dhe që po regjistroheshit edhe në zgjedhje. Ju në atë kohë keni thënë, sa për ne, jemi të gatshëm që t´i drejtohemi KQZ-së që ta shtyjë afatin e regjistrimit të partive, t´ju japin një mundësi tjetër atyre për t´u zgjedhur. Në fakt kjo tingëllonte si një tallje.
Astrit Patozi: Jo, qëndron në fuqi. Unë e them edhe sot, në rast se do të ekzistojë mundësia.
Gazetari: Por si mundet brenda kornizave legale të shtyhet data e zgjedhjeve.
Astrit Patozi: në vitin 2017, kur ne ishim jashtë listave të PD, në njëfarë mënyre jashtë politikës aktive pra politikës së lartë, ne nuk u ndiem. Kur të dy përgjegjësit kryesorë, të dy bashkëthemeluesit e marrëveshjes së pisët të Majit të vitit 2017 vendosën që të shkelin gjithçka, Kushtetutën, Kodin Zgjedhor, të gjitha rregullat dhe bënë ca zgjedhje që sot PD nuk i njeh.
Gazetari: Disa afate u shkelën. Mbizotëroi vullneti politik mbi ligjin. Kjo është e vërtetë.
Astrit Patozi: U shkel gjithçka. Përderisa u shkel atëherë, le të bëhet edhe tani me idenë që forcat politike që duan, të garojnë. Unë do të doja që PD të ishte pjesë e garës, edhe aleatët e saj gjithashtu. Do të ishte një garë e ndershme. Unë dua që Shqipëria të bëhet një vend normal, në këtë kontekst ne nuk jemi vend normal, kur shumë parti janë jashtë zgjedhjeve dhe disa parti të tjera garojnë. Unë do të doja t´ja jepnim këtë shans nëse është e mundur dhe nëse ata do të duan. Sepse ata mund të mos e duan këtë gjë.
Gazetari: Mesa duket këtë ka parasysh PS kur ende i bën thirrje Partisë Demokratike që të shkojë të regjistrohet. Pra këtë mbivendosjen e vullnetit politik mbi atë që në fakt janë kornizat ligjore.
Astrit Patozi: Unë nuk e di. Në rast se Partia Socialiste është e gatshme që ta bëjë ne e mbështesim, te kjo pikë. Te pjesa tjetër pastaj, jo.
Gazetari: Megjithatë ecim më tej. Z. Patozi, fushata zgjedhore si në çdo vend të botës, por tashmë edhe në Shqipëri prej 30 vitesh, dihet që kërkon disa fonde. Ju fonde nga shteti nuk merrni sepse ligji nuk jua lejon, pra nuk merrni nga torta që i ndahet partive politike për të zhvilluar fushatën. Një pyetje logjike është, ku do t´i gjeni fondet për të zhvilluar fushatë qoftë edhe në 25 bashki për kryetarë. Por janë shumë, 50 për lista bashkiake…
Astrit Patozi: Atëherë unë mund të deklaroj solemnisht tani që ne do të bëjmë një fushatë modeste sepse jemi një parti e re e krijuar dhe nuk mund të kemi as resurse. Ne sigurisht do i drejtohemi mbështetësve tanë që të bëjnë aq sa mund të bëjnë ata për të patur një minimum jetik, për të patur një zë në këtë fushatë. Në rast se qeveria do ta bëjë siç e ka bërë gjithmonë pra, do të jetë një betejë e Davidit me Goliathin. Por tek e fundit historia e njerëzimit ka provuar që nganjëherë paratë nuk hyjnë në punë. Edhe në Shqipëri ka ndodhur që pushteti është rrëzuar pavarësisht se ka resurse dhe ka financa shumë më të larta sesa opozita. Nuk mbahet populli në rast se vjen pika që e refuzon qeverinë. Ne besojmë te kjo gjë, ne besojmë që shqipëtarët do ta mbështesin partinë tonë për këto arsye sepse jemi në mes të një krize të fortë politike ku vendi qeveriset keq e mos më keq, ndërkohë që pala tjetër që duhet të ishte pot hemi pushteti moral, nuk jep asnjë shpresë.
Gazetari: Z. Patozi, Lulzim Basha, kryetari i PD, bën sot e gjithë ditën thirrje për bashkim të së djathtës dhe për bashkim të shqipëtarëve ndërkohë që sot e djathta është e ndarë midis Partisë Demokratike le të themi zyrtare, Partisë Demokratike në parlament, BINDJA DEMOKRATIKE që jeni ju për të mos folur edhe për të tjerët ose për disa parti të tjera aleate të së djathtës që janë shpërndarë aty – këtu. Cila është sipas jush e sotmja dhe e ardhmja e së djathtës në Shqipëri?
Astrit Patozi: Tani, ajo që mund të them unë me siguri është se cila është e ardhmja e BINDJES DEMOKRATIKE. Unë e shikoj si një udhëtim drejt suksesit për arsyet që Thashë më sipër dhe nuk mund të parashikoj se çdo të bëjnë të tjerët. Porn ë rast se ka një problem z.Basha, ka një problem shumë serioz, një problem mes asaj që thotë dhe asaj që bën dhe gjithë historia e krizës dhe mossuksesit të tij është pikërisht tëk kjo gjë. Pra, ai thotë gjëra të tjera dhe bën gjëra të tjera dhe unë nuk besoj se ai ka më fuqi sot që po flasim të bashkojë njerëz, sepse ndërkohë që po fletpër bashkimin, po i ikin dhe të fundit nga Partia Demokratike që ka mbetur. Por gjithsesi, unë nuk dua të paragjykoj. Ata janë në të drejtën e tyre ta shikojnë ashtu, për në nuk ka rëndësi.
Gazetari: Z.Patozi, ka një anëtar të parlamentit, deputeti Andi Përmeti që është anëtar i partisë tuaj, BINDJA DEMOKRATIKE, ndërkohë është i future në parlament si pjesë e listës së Partisë Demokratike, si anëtar zëvendësues i Parlamentit. Pra, konsiderohet parlamentare BINDJA DEMOKRATIKE, apo jo?
Astrit Patozi: Nuk e di, sepse kjo nuk është çështje teknike, kjo është çështje politike. Ai është një nga themeluesit e BINDJES DEMOKRATIKE dhe i takon të jetë përfaqësuesi i saj në Parlament. Kaq mund të themi. Tani, sesi e konsideron Gramoz Ruçi këtë gjë unë nuk di ta them, por mund të them që ne jemi një parti parlamentare, sepse kemi një deputet dhe mund të kemi edhe më shumë nesër.
Gazetari: Pra e quani veten Parti Parlamentare.
Astrit Patozi: Po, besoj që po.
Gazetari: Z.Patozi, për një periudhë shumë të gjatë kohe, për gati dy vjet, e keni mbajtur në një farë mënyre gjuhën kur ka qenë fjala për Sali Berishën, për arsye që edhe mund të kuptohen, keni qenë numri dy, keni qenë në parti për një kohë të gjatë. Fillimisht, besoj se ju të mërziturit e Partisë Demokratike, kur them ju, disa ish figura të Partisë Demokratike, ishit të paqartë nëse Partinë Demokratike, ky është ndoshta një koment i imi, e drejtonte Lulzim Basha apo Berisha në hije. Sot a jeni më të qartë për këtë?
Astrit Patozi: Jo, unë kam qenë gjithmonë i qartë. Unë nuk kam pasur asnjëherë dilema, por unë jam legjitimist si natyrë, pra unë jam politikan që nuk më interesojnë kulisat, nuk më interesojnë takimet e fshehta, nuk më interesojnë ato që thuhen në tavolinë.
Gazetari: Por politika pa ato nuk bëhet.
Astrit Patozi: Unë e di këtë gjë, por unë flas vetëm për gjestet dhe aktet publike dhe kur kam vënë targetin tek Lulzim Basha patur parasysh njeriun që ka firmosur dhe ka marrë përgjegjësinë për atë gjë që ka bërë. Nuk më intereson se kush e shtyn kush e tërheq dhe kush e shqyen, nuk më intereson.
Gazetari: Ju besoni se listat në vitin 2017 i bëri Basha ku juve dhe disa të tjerëve ju la jashtë?
Astrit Patozi: Jo, unë nuk e besoj atë, unë po të them që duke qënë legjitimist unë akuzoj atë që firmos dhe në rast se ai firmos për dikë tjetër atëherë është akoma më shumë problem, është dyfish problem. Sepse është një kukull, i bie të jetë një kukull dhe kjo e mbyll diskutimin. Pra, kam vënë targetin aty ku unë shikoj që është përgjegjësia. Unë nuk pashë që Z. Berisha të ishte në takimin e 17 Majit, aty ishin dy veta, ishte Z. Basha dhe Z. Rama që gatuan atë marrëveshje të shpifur sipas nesh, që prodhoi edhe këtë krizë, për të cilën po flasim, në vijimësi. Pse? Sepse në një politikë perendimore, në një demokraci të zhvilluar apo në një demokraci normale nuk mund të bësh pazar. Ai ishte një pazar i shpifur, sepse kur me dikë bën pazar mund të bësh edhe luftë pastaj, është fiks si në organizatat mafioze. Pra ti kundërshtarin nuk e ke për pazar, e ke për të garuar drejtpërdrejt në një përballje frontale.
Gazetari: Nuk jeni aspak pra i zhgënjyer Z. Patozi nga Sali Berisha? Nuk keni ju asnjë zhgënjim pas 2 viteve që jeni larguar? Ai aty brenda një figurë kryesore, ai frymëzuesi, ai më luftaraku, ai ideatori i pashpallur i gjithë aksionit politik të PD.
Astrit Patozi: Unë nuk kam asnjë arsye. Për sa kohë Z. Berisha thotë publikisht që unë jam tërhequr nga të gjitha detyrat e mia dhe bëj vetëm rolin e deputetit, që tani as atë se bën, unë nuk kam arsye pse të merrem me Z. Berisha kur ai thotë që këtë gjë e ka bërë Lulzim Basha. Pavarësisht idesë që mund të kem, unë jam i detyruar që të flas për faktin jo për atë që fshihet pas faktit.
Gazetari: Z. Patozi, përse nuk u bëtë dot bashkë ju ish figurat kryesore të PD? Topalli, Bode, Ruli etj. Përse nuk u arrit dot që të bëheshit bashkë? A do të kishit qënë ju një parti më e fortë me këto figura kryesore? Në korridoret e politikës ne e dime që thuhet që duke qënë të gjithë të fortë politikisht, figura dhe eksponentë të fortë ju nuk pranoni që dikush mes jush të ishte i pari. Si do t´i përgjigjeshit ju kësaj?
Astrit Patozi: Kjo nuk është fare e vërtetë sepse me të gjithë personat që ju përmendët, që janë ish kolegët apo kolegët e mi të nderuar, unë kam një komunikim perfekt edhe sot që po flasim dhe nuk na ndan asgjë në idenë që unë po elaboroj këtu.
Gazetari: Por çfarë nuk ngjiti? Se atyre nuk i ka ngordhur nervi politik.
Astrit Patozi: Nuk ka lidhje kjo, sepse në rast se ata do të ishin ju do të kërkonit disa të tjerë, do thonit po ata të tjerët pse nuk janë? Pra, kjo do ishte një lojë kungulleshkash që nuk do merrte fund asnjëherë. Ka njerëz që vendosin ndryshe, pra vendosin që të tërhiqen. Siç është rasti i Z. Ruli përshembull. Mund t´i thuash atij pse nuk është këtu? Ai ka 3 vite që është tërhequr, ka thënë publikisht unë nuk do merrem më me politikë, do tërhiqem e do vëzhgoj politikën nga ballkoni. Tani, të thuash pse nuk është Z. Ruli është e padrejtë, apo jo?
Gazetari: Por nuk është e njejta gjë për Jozefina Topallin.
Astrit Patozi: Po jo pra, nuk është kështu! Sepse Jozefina Topalli mund të vijë nesër, çfarë do thoni ju pastaj? Mund të vijë nesër sepse i ka dyert e hapura, kjo është një parti, shtëpi e lirisë që kush do mund të vijë. Kjo është një parti jo personale, sepse po të ishte personale unë nuk largohesha fare nga Partia Demokratike, sepse personale ishte ajo. U bë një parti e një familjeje, u çua në shtëpi e gjitha dhe unë nuk mund të qëndroja më bashkë me kolegët e mi në një ambient të tillë ku nuk ekzistonin as rregullat minimale për një organizatë politike.
Gazetari: Z. Patozi, cila është marëdhënia e BINDJES DEMOKRATIKE me grupin demokrat në parlament, ai që quhet Grupi Demokrat?
Astrit Patozi: Ne e kemi mbështetur dhe përshëndetur krijimin e grupit dhe me aq sa mund të bëjmë ne i mbështesim. E para që u futën në parlament, sepse ne mendojmë që është më mirë të futesh nga listat vijuese në parlament sesa të ikësh nga parlamenti fare. Pra midis atyre që ikën dhe këtyre që erdhën, janë më mirë këta të fundit. Kjo është BINDJA jonë DEMOKRATIKE, kjo pikë. Ata janë të lirë të zgjedhin, ata mund të mos na duan kurrë. Ne do t´i mbështesim prapë, ata mund të vijnë nesër, dyer ti kanë të hapura. Ata mund të zgjedhin gjë tjetër.
Gazetari: Ata në të ardhmen mund të bëhen rivalët tuaj, konkurentë me ju.
Astrit Patozi: Tani, politika është treg dhe Shqipëria kur pranoi të ndryshonte sistemin, pranoi rregullat e tregut. Ne akuzohemi sot tradhtarë, po tradhtarë të kujt? Tani këta kanë lënë 61 bashkitë në duart e Edi Ramës që t´i emërojë si drejtorë, ne që po dalim përballë Edi Ramës ne jemi tradhtarë. Kë kemi tradhtuar ne? Pastaj çfarë kuptimi ka që të më thuhet mua dhe kolegëve të mi që pse ju nuk bëni si ne? Po sepse jemi të ndryshëm ne. Ne jemi të ndryshëm dhe ne kemi vizion tjetër për politikën dhe për gjëndjen që po kalon sot Shqipëria. Ata thonë që pse s´bëni si ne ju, ju jeni tradhëtarë. Te kujt?
Gazetari: E prekëm pak më parë Z.Patozi, por unë do të doja një opinion ndoshta edhe më të qartë. Tani, nga përvoja politike e Astrit Patozit si politikan në disa dekada tashmë, në 30 Qeshor një parashikim. Do të ketë zgjedhje apo destabilizim? Sa janë shanset për destabilizim, për konflikt social, për rrëmujë dhe sa për t´u mbajtur zgjedhjet?
Astrit Patozi: Unë kam vetëm një përgjigje. Unë mendoj që zgjedhjet do bëhen sepse nuk mbahet dot vullneti i popullit për t´u shprehur. Ata që mendojnë ndryshe janë të lirë ta mendojnë ashtu, por unë unë besoj te kjo gjë dhe them që sado përpjekje për destabilitet të ketë, zgjedhjet do të mbahen dhe zgjedhjet do të prodhojnë rezultat.
Gazetari: Sa shanse ka që në Shqipëri të ketë zgjedhje të parakohshme përpara vitit 2021?Është një tezë që komentohet, që është pjesë e debatit publik. Disa mendojnë që kjo, dmth PD e ka shpallur si objektiv ndërsa disa të tjerë mendojnë që kjo do t´i bënte dëm Partisë Demokratike, nuk do të kishte kohë të pregatitej aq shumë opozita në përgjithësi dhe do të ishte ndoshta një zhvillim pozitiv më shumë për qeverinë. Ju si mendoni?
Astrit Patozi: Tani, e para njëherë duhet të mendojmë që e kemi kapërcyer 30 Qershorin, pra kemi dalë nga 30 Qershori, flasim për të ardhmen. Ne nuk e kemi atë hall. Për fat të mirë nuk e kemi sepseçfarëdo që të ndodhë ne jemi të pregatitur, do bëhen të parakohshme ne do hyjmë në zgjedhje prapë, do bëhen në kohën e duhur në vitin 2021 ne do shkojmë prapë në zgjedhje. Është problemi i tyre, sidomos do jetë problemi i tyre që do mbeten jashtë në rast se nuk do të ndodhë ndonjë mrekulli që ditët e fundit të reflektojnë dhe të futen edhe ata në zgjedhje.
Gazetari: Ky ishte një qëndrim si BINDJA DEMOKRATIKE. Si politikan që e njihni mirë politikën, si mendoni ju? Ka shanse në Shqipëri të ketë zgjedhje të parakohshme apo jo?
Astrit Patozi: Normalisht ka shanse sepse, edhe qeveria besoj do ketë nevojën për ta patur të plotë opozitën. Pra, që qeveria për të matur forcat e veta, për të patur të gjithë opozitën përballë. Pra është edhe nevojë e qeverisë por edhe e opozitës, që mund të mbesë jashtë, që të tregojë që ka shifra, numra. Sepse çfarë ndodh? Në rast se PD dhe LSI nuk marrin pjesë në zgjedhje, që unë s´do e dëshiroja kurrë, ndodh që PD sot nuk ka asnjë numër në parlament dhe i bie që të mos ketë asnjë numër në pushtetin lokal dhe asnjë këshilltar. I bie që është në kuotën zero dhe sigurisht që është një realitet, sado t´i kenë rënë kuotat Partisë Demokratike me këtë qëndrim, ajo prapëseprapë është realitet. Dhe qeveria duhet të bëjë përpjekje ta testojë sesa vlen se sa vlen ajo që mbetet nga opozita që del jashtë zgjedhjeve.
Gazetari: Pyetja ndoshta e fundit për sot mund të mos jetë fare në interes të BINDJES DEMOKRATIKE, por pjesë e debatit publik, sfidë e madhe e qeverisë mbetet hapja e negociatave këtë Qershor. Ju si mendoni, sa ndikon kjo krizë politike në Shqipëri në atë vendim që duhet të marrë Brukseli në fund të Qershorit?
Astrit Patozi: Unë besoj se do të ketë ndikimin e saj dhe unë nuk mendoj se është ngjarje e rëndësishme më për Shqipërinë. E di si është kjo punë? Të flasësh sot për hapjen e negociatave është si t´i thuash një njeriu që ka marrë plumbin në shpatull të merret me gërvishtjen e këmbës. Negociatat janë problem më i vogël sot sipas meje sesa kriza ku është vendi, pra ka zgjedhje apo nuk ka zgjedhje, gjysma e parlamentit është jashtë, i ka lënë mandatet, gjysma tjetër thotë s´ka problem. Pra unë them që ky është problemi kryesor por sigurisht hapja ose mos hapja e negociatave afektohet edhe nga kjo krizë.
Gazetari: Z. Patozi unë ju falenderoj dhe ju uroj suksese ashtu siç i uroj çdo partie politike.
Astrit Patozi: Të fitojnë të gjithë. (qesh
