“Pasoja të paimagjinueshme për Izraelin”, Irani premton përgjigje të forte, por do bashkëpunim me perëndimin
Sulmi i Izraelit kundër Iranit do të ketë pasoja të paimagjinueshme! Është zotimi që bën komandanti i Gardës Revolucionare në Iran, Hossein Salami pasi Izraeli e vuri në zbatim të shtunën planin e raprezaljes, duke shënjestruar baza ushtarake në Iran. I cituar nga mediat në vend, Salami pohon se Izraeli nuk e përmbushi qëllimin e vet, me sulmet ajrore, duke e cilësuar këtë një sinjal të gabimit në llogaritje dhe paaftësi.
Po ashtu, zëdhënësi i Ministrisë së Jashtme të Irani, Esmaeil Baghaei paralajmëroi se do të përdornin të gjitha mjetet në dispozicion për t’iu përgjigjur në mënyrë të vendosur dhe efikase agresionit të izraelit. “Normalisht, lloji i kundërpërgjigjes, vlerësohet mbi bazën e llojit të sulmit”, ishte deklarata e tij. Por paralelisht me mesazhin që kujdeset t’i japë Izraelit, Teherani i përcjell Perëndimit sinjalet se nuk e do një përshkallëzim.
Një këshilltar i lartë i liderit supreme të Iranit, Ajtollahu Ali Khamenei u shpreh se janë të gatshëm për bashkëpunim me shtetet perëndimore, edhe pse e akuzon SHBA për mbështetje të pakushtëzuar ndaj Izraelit. Ali Akbar Velayati, ish-ministër i Jashtëm me lidhje të ngushta me Khamenei i tha Financial Times se republika Islamike po rivlerësonte politikën e jashtme, në mënyrë që të mundësonte marrëdhënie më të mira me Perëndimin, përfshirë shtetet e BE.
Analistët në Teheran parashikojnë se Republika Islamike do të përmbahet nga një përgjigje e menjëhershme ushtarake, duke sinjalizuar një lloj përmbajtjeje, për të mos nxitur një konflikt më të gjerë rajonal.
/a.r
