“Nacionalizmi i madh serb dëshiron të përfitojë nga rirregullimi gjeopolitik, pavarësisht faktit se Ballkanit tashmë kjo i ka kushtuar 150,000 jetë njerëzish”. Kështu ka deklaruar presidenti malazez Milo Gjukanoviç në një intervistë për televizionin RTL.
Duke folur për destabilizimin e rajonit vitin e kaluar, ai vuri në dukje se ishte një përpjekje për të rinovuar politikat e vjetra, retrograde të ndërtimit të shteteve të mëdha në Ballkanin Perëndimor dhe se ideja u nis si një alternativë për krijimin e shteteve të mëdha, etnikisht dhe fetarisht homogjene.
“Pastaj ajo ide u shemb dhe gati 150,000 njerëz e paguan me jetën e tyre. Tani, ndoshta të inkurajuar nga ndryshimet gjeopolitike, ideologët e atyre nacionalizmave të mëdhenj shtetorë po përpiqen ta rinovojnë atë ide dhe Mali i Zi është sulmuar, sepse ne e dimë se nuk ka ‘Serbi të Madhe’ pa Malin e Zi në përbërjen e tij”, tha Gjukanoviç, raporton televizioni publik i Malit të Zi.
Ai theksoi se nuk ka dyshim se udhëheqja shtetërore e Serbisë, e kryesuar nga Aleksandar Vuçiç, qëndron pas kësaj.
“Pasi Serbia humbi Kosovën, Mali i Zi duket të jetë kompensimi më tërheqës dhe një pjesë e pashmangshme në mënyrë që të mbajë gjallë idenë e Serbisë së madhe”, beson Gjukanoviçi.
Sipas tij, Kisha Ortodokse Serbe është një instrument për realizimin e nacionalizmit serbomadh.“Në vitet 1990, kishte më shumë nga këto instrumente-JNA, policia jugosllave, shërbimi jugosllav i sigurisë, zakonet dhe ligjet – ndërsa sot më nuk janë ato dhe vetëm Kisha Ortodokse Serbe ka pranuar të jetë instrument i projektit shtetmadh, i cili manifestohet shumë qartë në problemet aktuale në Mal të Zi”, tha me tej Gjukanoviç.
I pyetur nëse mund të ketë konflikte serioze në Mal të Zi, Gjukanoviç tha se “nuk është e lehtë të merresh me Serbinë, veçanërisht nëse e dini se një forcë gjeopolitike siç është Rusia qëndron pas saj”.
g.kosovari
