Avokati Spartak Ngjela paralajmëroi ditën e djeshme se vala e arrestimeve maqedonase do të mbërrijë së shpejti edhe në Shqipëri. Teksa në Maqedoni është lëshuar një urdhër-arresti ndërkombëtar për ish-kryeministrin maqedonas, Nikolla Gruevski si edhe është vënë në pranga dje edhe ish-ministri i Transporteve, Mile Janakievski, Ngjela pret që e njëjta gjë të ndodhë edhe me politikanët shqiptarë. Në një reagim të dhënë për gazetën “SOT”, kryetari i Partisë Ligj dhe Drejtësi u shpreh se arrestimet në Maqedoni duhet të shërbejnë si një mesazh për të gjithë pushtetarët shqiptarë të lidhur me Moskën. Sipas tij, në shtetin fqinj po dalin përballë drejtësisë ata politikanë të lidhur me shtetin rus, ndaj theksoi se një gjë e tillë pritet të ndodhë edhe në Shqipëri. “Rastet janë të lidhura. Atje politika amerikane u tregua shumë e rreptë dhe i ka ndihmuar shumë maqedonasit. Ai ishte një korrupsion banal i lidhur me Moskën dhe kundër shqiptarëve.
Në këtë rast kemi një paralele midis eliminimit të korrupsionit politik dhe ekonomik të partisë së Gruevskit dhe ngritjes së personalitetit të të drejtës së shqiptarëve. Ata vjedhin nëpërmjet korrupsionit dhe përkrahen nga Moska. Por në këto momente ka ndryshuar. Edhe në Shqipëri politika amerikane po e drejton luftën kundër korrupsionit. Edhe korrupsioni shqiptar nuk është ashtu i palidhur, është i paguar nga forcat antishqiptare. Mendoj që kështu do të shkojë edhe këtu. Asnjë ndryshim nuk do të ketë nga Maqedonia”, tha Spartak Ngjela. Gazeta e paralajmëroi para pak kohësh sesi një pushtetar i lartë shqiptar mbante lidhje me Rusinë përmes këshilltarit të tij. Mesa duket, Ngjela po paralajmëron se të gjithë politikanët që kanë lidhje me Moskën do të përballen së shpejti me drejtësinë, njësoj siç po ndodh edhe në shtetin maqedonas.
Arrestime dhe konfiskime pasurish
Avokati Spartak Ngjela theksoi dje se viti i ardhshëm do të sjellë një valë arrestimesh në Shqipëri. Sipas tij, gjatë 2019, me ngritjen e organeve të reja të drejtësisë do të nisin hetimet në nivele të larta dhe do të ketë edhe konfiskime pasurish të vëna nga grabitja e qytetarëve.
“E dyta pastaj, këtu flitet për konfiskimet e parave dhe marrjen e pronave. Këtu ka nga këta të korruptuar që kanë nga 2000 hektarë, mijëra hektarë tokë jua kanë marrë shqiptarëve. Ju kanë dhënë 20% dhe ju kanë marrë 80% të pronës. Ata i kanë vënë parakusht o merre këtë pronë që të jap ose mos e merr fare. Këtu do të fillojë hetimi, tek shpronësimi i njerëzve që kanë fituar para përmes grabitjes së shqiptarëve. Të paktën kjo është optika e deritanishme”, tha Spartak Ngjela. Avokati deklaroi se me qëllim që një gjë e tillë të arrihet, Shtetet e Bashkuara të Amerikës do të rrisin presionet, ndërsa nënvizoi se shanset për azil politik për politikanët e rrezikuar nga drejtësia e re janë zero. “Politika amerikane do ta vazhdojë presionin për zbatimin e Kushtetutës, për krijimin e KLGJ dhe KLP dhe Byrosë Kombëtare të Hetimit të cilat, të gjitha mendohet të realizohen deri në datat 15 ose 20 dhjetor. Kështu që mendoj se kjo do të jetë ecuria edhe në Shqipëri. Se cilat do të jenë goditjet penale do t’i shikojmë. Të korruptuarit kanë marrë masa nëpër vendet armike të Shqipërisë, por nuk ma do mendja që të fitojnë azil politik aq kollaj”, u shpreh dje avokati Spartak Ngjela.
a.ç
